Tedi Blushi, Zëdhënës i Presidentit Ilir Meta, ka reaguar përmes një postimi në rrjet ndaj propozimeve të Taulant Ballës mbi Komisionin e Venecias.
Venecia miraton sot raportin përfundimtar lidhur me çështjen e shtyrjes së zgjedhjeve lokale të 30 qershorit nga Kreu i Shtetit, ndërsa Taulant Balla, kreu i Grupit Parlamentar socialist, ka bërë disa propozime.
Deputeti socialist Balla ka deklaruar se Presidenti Meta nuk ka bërë asnjë përpjekje për dialog, ndërsa ka theksuar se sipas tij, Kreu i Shtetit shkeli të drejtën themelore për t’u zgjedhur.
“Draft-opinioni është i plotë dhe analiza është shumë profesionale. Kam disa propozime për amendimin e raportit. Presidenti i Republikës nuk ka bërë asnjë përpjekje për dialog mes partive. Shkeli të drejtën themelore të drejtën për t’u zgjedhur”, deklaroi Balla.
Por propozimet e Ballës janë cilësuar si propogandë bajate nga Tedi Blushi.
“Propozimet e Tao Tao-s gajasën sot të madh e të vogël në Komisionin e Venecias.
Hëngri një dajak të fortë, por mënd nuk zuri, dhe vazhdon propogandën bajate me titra të porositura.
I kujtoj Tao Tao-s “hurin” që mori nga raporteri i çështjes për rrjedhjen në media të Draf-Opinionit, për keqpërdorim politik. Dhe nëse nuk është ftilluar akoma, ai dhe delegacioni që e shoqëron, le të bëjnë një vizitë në Bienalen e Venecias, se ndoshta u bie stresi.
Sa për Presidentin, çështja është e qartë si kristali: ZERO SHKELJE TË KUSHTETUTËS.
Tani të gjithë të bashkuar të mbështesim kuqezinjtë në sfidën e mbrëmjes”, shkruan Blushi në reagimin e tij.
