Prokuroria e Kavajës ka urdhëruar ndalimin e Marsida Qatjas. Ajo është thirrur sërish sot pasdite në polici dhe është marrë në pyetje mbi dëshmitë që ka dhënë mbi ngjarjen e rëndë, që ndodhi brenda banesës së saj, ku u vra Dritan Hoxholli dhe u plagos shefi i sigurisë së burgut të Durrësit, Bledar Toçi. Shkak për marrjen e saj sërish në pyetje, janë bërë deklarimet kontradiktore që Marsida Qatja ka dhënë në polici dhe medie.
Ajo do të japë sërish dëshmi edhe për origjinën e kokainës së gjetur në banesë.
Marsida Qatja, 30-vjeçarja që u bë “mollë sherri” e konfliktit të armatosur, tha se Dritan Haxholli u vra në kushtet e vetëmbrojtjes nga polici Bledar Toçi.
Qatja, nënë e tre fëmijëve rrëfeu sërish sot njohjen që kishte me Dritan Haxhollin, viktimë e ngjarjes, dhe Bledar Toçin, autor i vrasjes, aktualisht i plagosur nga 41-vjeçari pas përplasjeve me armë.
Marsida Qatja, tha sot se viktima e kërcënonte prej kohësh dhe se ishte në kërkim, ndërsa i plagosuri sipas saj është hero që e shpëtoi atë dhe fëmijët.
Ajo tha se nuk ka patur asnjë lidhje me te dy burrat.
