Elisa Spiropali, ministre e Shtetit për Marrëdhëniet me Parlamentin, nuk ka nguruar të përfshijë edhe Presidentin Ilir Meta si pjesë të lojës të atyre që nuk donin hapjen e negociatave.
Spiropali ishte një nga ministret që firmosi letrën që iu dërgua Parlamentit holandez, përmes të cilës kërkohej hapja e negociatave.
“Ishte një vendim që ne e morëm së bashku për të dërguar një shkresë. Jemi krenare që qeveria shqiptare është një nga qeveritë me balancën gjinore ndër më të lartat në botë. Ishte iniciativa jonë për ta çuar komunikimin me senatin dhe parlamentin holandez në një tjetër nivel.
Ne renditëm aty arritjet e Shqipërisë dhe nuk ka asgjë të keqe. Përkundrazi besoj se Shqipëria është e paragjykuar.
Nuk ka të bëjë aspak me përdorimin e grave siç thuhet rëndomë por me faktin që qeveria duhet dhe do t’i thotë aspektet pozitive të zhvillimit të saj. Ne nuk presim përgjigje. Është një letër që iu drejtohet të gjithëve dhe besoj krijon një kanal të ri komunikimi me parlamentin”, deklaroi ajo.
Në vijim, ministrja e Ramës tha se ne jemi përballur me një opozitë që nuk lë vend, nuk lë derë BE-je, nuk lë parlament, parti apo mik shtëpie të tyre që nuk u shkon për të thënë që Shqipëria nuk është gati dhe këtë e thonë publikisht, duke thënë që Shqipëria është një narkoshtet, duke thënë që Shqipëria nuk e meriton”.
Ajo tha se edhe Presidenti i Republikës u bë pjesë e kësaj loje duke përmendur intervistën e tij për televizionin shtetëror estonez.
“Për fat të keq pjesë e kësaj loje u bë dhe Presidenti i Republikës, ku në median estoneze deklaroi që kryeministri i Shqipërisë nuk e ka qejf demokracinë dhe do të uzurpojë institucionet. Përfytyroni dot ndonjë president shteti që shkon edhe flet me këto terma kundër vendit të tij? Nuk ekziston sepse nuk ka dhe nuk e keni dëgjuar sepse nuk ekziston”, deklaroi Spiropali
