Një tjetër deputet i asaj që quhet “opozita e re”, Ralf Gjoni ka paralajmëruar një vendim negativ më 18 tetor për hapjen e negociatave.
Gjoni shkruan se pa filluar nga puna Spak & BKH dhe pa një reformë të thellë të sistemit zgjedhor, s’ka hapje negociatash.
“Në Kopenhagen ku u takuam me Komisionin për Çështjet Evropiane në Parlamentin Danez. Thellësisht i trishtuar për skepticizmin që ndjemë ndaj hapjes së negociatave me Shqipërinë dhe imazhin negativ që vendi ynë reflekton në shumë vende anëtare të BE.
Shqipëria nuk do të avancojë dot asnjë hap pa filluar nga puna SPAK & BKH e pa një reformë të thellë të sistemit zgjedhor që të garantojë votën e çdo qytetari shqiptar e të mundësojë largimin një herë e mirë të kësaj kaste mafjoze politike që ka kapur peng të ardhmen evropiane të secilit prej nesh”, shkruan Gjoni në një postim në rrjet.
Një ditë më parë ishte Rudina Hajdari që dha lajmin se Danimarka nuk mbështet hapjen e negociatave mes Shqipërisë dhe BE-së, në mbledhjen e Këshillit më 18 tetor.
