Gjykatësja serbe Danica Marinkoviç, ka rrëfyer në një televizion në Beograd momentin kur ajo ka dënuar Albin Kurtin me 15 vite burg në vitin 1999, pasi ky i fundit ishte arrestuar në Prishtinë gjatë bombardimeve.
Ajo ka dënuar shumë persona por Kurtin e kujton për faktin se ai ishte një “nacionalist ekstrem”. Gjyqtarja thotë se ai kishte mohuar shtetësinë serbe dhe kishte thënë se ishte një shtetas i Republikës së Kosovës edhe pse shteti i Kosovës nuk ekzistonte në atë kohë.
Ajo shprehet:
Gjatë marrjes së të dhënave personale kur është pyetur se shtetas i cilit vend është menjëherë kam ardhur në përfundimin se ai është nacionalist ekstrem, me nacionalitet më tha se është shqiptar, e kur e pyeta se shtetas i cilit vend është tha i Republikës së Kosovës , pra atëherë as që ka ekzistuar Republika e Kosovës. Ne i thamë se krahina e Kosovës është në kuadër të Serbisë, ai tha “jo” unë nuk e njoh shtetin serb, është shtet okupator, populli serb është okupator dhe unë jam shtetas i Republikës së Kosovës”.
Albin Kurti në vitin 1999 ishte pjesë e Zyrës së UCK-së në Prishtinë e cila drejtohej nga Adem Demaçi e ku Kurti ishte si ndihmës i tij dhe përkthyes.
Ndër të tjera ajo kujton edhe momentin kur Albin Kurti thekson se ai kurrë nuk do bëhej pjesë e ushtrisë serbe pasi ishte pjesë e UÇK-së.
Ajo thotë:
Ai i është bashkuar UÇK-së në vitin 1998, dhe ai më tha mua mos gaboni ta shkruani e ashtuquajtura UÇK se për ne shqiparët UÇK është ushtri e vërtetë çlirimtare, e cila po lufton me policinë serbe për ta çliruar Kosovën që ta bëjmë shtetin e pavarur”.
