Akademia prestigjioze e çmimeve Nobel ka ndarë çmimet Nobel në Letërsi për vitin 2018 dhe vitin 2019. Shkrimtari shqiptar, Ismail Kadare, i nominuar për të disatën herë, sërish s’ka mundur të fitojë. Çmimi Nobel për dy vitet iu është dhënë dy lauretëve, Olga Tokarczuk dhe Peter Handke.
‘Këtë vit u dhanë dy çmime “Nobel” në letërsi, për të kompensuar çmimin e vitit 2018. Nobeli vitin e kaluar nuk u dha, për here të parë që nga viti 1949, për shkak se Akademia Suedeze, institucioni më i rëndësishëm që zgjedh fituesin u përfshi në një skandal të pahijshëm seksual’.
Secili prej çmimeve do të shoqërohen me nga një medalje ari dhe nëntë milionë korona (830,000 euro, 908,000 dollarë).
‘Mund të ndodhë që “fituesi ose fituesit ta refuzojnë ” sepse mendojnë se çmimi është dëmtuar’, paralajmëroi për të përditshmen suedeze ‘Svenska Dagbladet’, Madelaine Levy, kritike letrare.
Çdo vit, që nga hera e parë në 1901, qarqet letrare përballen me spekulime, më shumë si një pasqyrim i dëshirave të tyre sesa një pasqyrë e vërtetë e prirjeve të Akademisë.
Në listën e të nominuarve për këtë çmim ishte edhe shkrimtari shqiptar Ismail Kadare.
International Business Times listoi të nominuarit për Nobel: shkrimtari polak Olga Tokarczuk, autori kenian Ngugi Wa Thiong’o, Ismail Kadareja i Shqipërisë, novelisti amerikan Joyce Carol Oates dhe Haruki Murakami i Japonisë.
Fituesi i çmimit Nobel në Letërsi për vitin 2017 ishte shkrimtari anglez Kazuo Ishiguro.
