Një ngjarje e rëndë ka ndodhur në Kavajë rreth orës 1 pas mesnate, ku një person ka vdekur dhe një tjetër është plagosur. Viktima është Dritan Haxholli, 41 vjeç, i DIVORCUAR dhe me fëmijë ndërsa i plagosuri Bledar Toçi, 29 vjeç, Shef i Regjimit të Brendshëm në burgun e Durrësit.
Krimi dyshohet të ketë ndodhur për motive pasioni.
Dinamika
“Rreth orës 00.40, në Lagjen nr. 2 Kavajë, shtetasi D.H. (Dritan Haxholli) banues në Kavajë, ka hyrë në banesën e shtetases M.Q. Në banesë ndodhej dhe shtetasi B.T. (Bledar Toçi), banues në Kavajë, punonjës i Policisë së Burgjeve. Shtetasi D.H. është konfliktuar me shtetasin B.T. dhe si pasojë shtetasi D.H. ka qëlluar me armë në drejtim të shtetasit B.T duke e plagosur atë. Shtetasi B.T me armën e shërbimit ka qëlluar në drejtim të shtetasit D.H i cili ka ndërruar jetë në vendngjarje. Shtetasi B.T, ndodhet jashtë rrezikut për jetën. Grupi hetimor po vijon punën për sqarimin e mëtejshëm të rrethanave të ngjarjes”, njoftoi policia.
Paraprakisht, dyshohet se si viktima kishte lidhje sentimentale me shtetasen M.Q. Kjo e fundit dyshohet se i kishte dhënë fund lidhjes, por vendimi i saj nuk pranohej nga Haxholli. Ndaj ajo kishte kërkuar ndihmën e Toçit, pasi ishte njoftuar nga Haxholli se do ti shkonte në banesë.
