Nga Boldnews.al
Kryeministri Edi Rama kaloi thuajse në ekstazë kur, nga foltorja e Parlamentit prezantoi “shpikjen” e tij të re, KÇK (Kap çfarë të kapësh), referuar gjyqtarëve dhe prokurorëve që, sipas tij, po shantazhojnë në mënyrë kriminale zyrtarët e ndershëm të Rilindjes.
Por, nga ana tjetër, Rama nuk ka dhe, natyrisht as nuk pritet të ketë ndonjë kritikë sado të vogël për një kategori tjetër gjyqtarësh-“Ule kokën se të hap gropën Erioni (Veliaj”.
Avokati Ledio Braho, në një status në rrjetin social Facebook, ka ironizuar deklaratat e kryeministrit Edi Rama, duke i përmendur ata gjyqtarë, të cilët, nga frika e pushtetit, nuk guxojnë të dalin kundër kryebashkiakut të Tiranës.
“Është e vërtetë që në sistemin e drejtësisë ka gjyqtarë KÇK (kap ça të kapësh), por ama ka edhe shumë gjyqtarë UKEHG (ule kokën se Erioni të hap gropën!”, shkruan avokati Braho.
Më tej, juristi i njohur shprehet: “Janë dy vendime gjyqësore, ku Erion Veliaj, në njërin është paditës dhe në tjetrin i paditur për shpifje.
Kur Erioni është i paditur dhe mbrohet me argumentin se deklarimet bazohen në informacion të prejardhur publik, ai përjashtohet nga përgjegjësia.
Kur Erioni është paditës dhe e paditura mbrohet me të njëjtin argument, kjo e fundit nuk përjashtohet nga përgjegjësi”.
Ky është konstatimi i avokatit Braho, i cili e mbyll komentin e tij me një shprehje ironike: “Kjo është drejtësia e re”!
Avokati Braho e shoqëron komentin e tij me foto të dy vendimeve gjyqësore.
Në të parin, kryebashkiaku Veliaj është i paditur për shpifje nga ish-Zonja e Parë, Odeta Nishani.
Gjykata ka justifikuar deklarimet shpifëse të Veliajt ndaj bashkëshortes së Presidentit të asaj kohe Bujar Nishani, me argumentin se “Veliaj kishte përdorur informacion të prejardhur nga të dhënat publike”.
Por ky qëndrim i gjykatës tjetërsohet kur Erion Veliaj është paditës. Gjykata e Tiranës dënoi me 1 milionë lekë gjobë ish-deputeten e Partisë Demokratike, Albana Vokshi, për shpifje ndaj kryebashkiakut të Tiranës.
Vokshi paraqiti në gjykatë të njëjtat argumenta që kishte paraqitur më parë edhe Veliaj në përballjen me Odeta Nishanin-pra, që deklarimet e saj bazoheshin në informacion të prejardhur.
Por gjykata e Tiranës nuk mund të dilte kundër vullnetit të Erion Veliaj. Gjyqtarët tashmë e dinë se duhet “të ulin kokën para Erionit, pasi ai u ha kokën”!
DENONCO