Nga Boldnews.al
Elona Kana, bashkëshortja e nënkryetarit socialist të Komisionit Qendror të Zgjedhjeve, Denar Biba, përballet mesditën e së Enjtes për herë të dytë me Komisionin e Pavarur të Kualifikimit, pasi ky institucion rrëzoi kërkesën e saj për përjashtimin e relatores së trupës së Vetingut, Xhensila Pine.
Kana, një ndihmëse ligjore në Gjykatën e Lartë, kërkoi përjashtimin e Pines nga trupa gjyqësore në seancën e kaluar (3 Tetor), me argumentin se “komisionerja është e zgjedhur politikisht nga Partia Demokratike dhe, për këtë shkak, ka reflektuar qëndrim të njëanshëm gjatë procesit të rivlerësimit, për të goditur politikisht bashkëshortin, Denar Biba”.
Një tjetër trupë e KPK-së ka shqyrtuar kërkesën proceduriale të Kanës dhe ka vendosur të mos e pranojë. Ky vendim lexohet në faktin se Kana do të përballet sërish me të njëjtën trupë gjykuese, të kryesuar nga Olsi Komici, relatore Xhensila Pine dhe anëtare Suela Zhegu.
Në seancën e kaluar, subjekti Elona Kana la të kuptohet se procesi i rivlerësimit ka nxjerrë një seri problematikash, sidomos në kriterin e pasurisë. Sipas saj, ky rezultat negativ ka ardhur për shkak të “njëanshmërisë së relatores Pine”, e cila nuk ka marrë në konsideratë një raport financiar të dorëzuar prej saj.
“Boldnews.al” ka raportuar më herët mbi pasurinë e bashkëshortëve Denar Biba dhe Elona Kana, ku konstatohen pasuri të shumta, me burim financiar të dyshimtë, si edhe tre apartamente në pronësi të tyre, njëri prej të cilëve dhuratë.
Pasuria/ Bashkëshortja e Denar Bibës para Vetingut, dyshimet mbi milionat e dhuratat