Hilmi Lakti është zgjedhur kryetar i Këshillit të Qarkut Shkodër. Ai ka marrë votëbesimin e 18 nga 20 prej anëtarëve të këshillit.
Po në këtë mbledhje pritet të zgjidhet edhe nën kryetari i Këshilli të Qarkut të këtij qyteti.
Zgjedhja e Hilmi Laktit ka qenë një nga temat e diskutimit edhe në mbledhjen e kryeministrit Rama që zhvilloi dje në seli me komisionin dhe deputetët e qarkut.
Ajo që u vu re në këtë mbledhje ishte mungesa e kryetares në detyrë të bashkisë së Shkodrës, Voltana Ademi, ndonëse të ftuar kanë qenë kryetarët e bashkisë së Malsisë së Madhe, të Vaut të Dejsë, Pukës dhe Fushë Arrëzit.
E pyetur nga mediat, Bashkia Shkodër deklaroi se Ademi tha se nuk ka pasur asnjë njoftim.
“Kryetarja e Bashkisë së Shkodrës zj. Voltana Ademi, është përjashtuar nga pjesëmarrja në mbledhjen e Këshillit të Qarkut. Qytetarja e Parë e Shkodrës nuk ka patur asnjë njoftim apo ftesë për këtë mbledhje”.
Ndërkohë, Prefekti Cesk Millja tha për mediat se mungesa e Ademi është për shkak se ajo nuk ka dalë në postin e kryetares së bashkisë nga zgjedhjet e 30 qershorit.
