Aleksandër Luca, shqiptari i akuzuar për vrasjen e studentes greke Helen Topaloudi ka folur për akuzat ndaj tij.
“Unë jam i pafajshëm. Unë jam padrejtësisht në burg. Gjithçka do marri kohën e saj dhe gjithçka do të zgjidhet,” tha ai për gazetarët ndërsa dilte nga salla e gjyqit në Kos me pranga në duar.
Përveç vrasjes, ai po gjykohet në Kos edhe për përdhunimin e një vajze 19 vjeçe me aftësi të kufizuara.
Ngjarja
Për përdhunimin dhe vrasjen e Helen Topaloudi në Rodos, të akuzuar janë i riu shqiptar Aleksandër Luca dhe greku Manoli Koukouras. Ngjarja e rëndë ndodhi rreth 11 muaj më parë. 20-vjeçari është i arrestuar së bashku me shokun e tij grek Manolis Koukouras 21 vjeç si autorë të dyshuar të dhunimit, abuzimit seksual dhe vrasjes së studentes Eleni Topaloudi. Kjo e fundit ishte qëlluar disa herë me shufër hekuri në kokë në banesën e saj. Më pas, ishte lidhur nga këmbët dhe ishte hedhur në det. Trupi i pajetë u gjet të nesërmen. Ekspertiza konfirmoi se studentja kishte humbur jetën si pasojë e mbytjes, që do të thotë se mund të ishte gjallë nëse do të ishte dërguar në spital, pavarësisht se kishte pësuar dëmtime të rënda në kokë si pasojë e goditjeve me shufër hekuri.
Aleksandër Luca dhe Manolis Koukouras kanë pranuar të dy përfshirjen në këtë krim të tmerrshëm. Por asnjë prej tyre nuk pranon fajësinë e vrasjes dhe zhdukjes së trupit. Ata akuzojnë njëri-tjetrin për këtë pjesë. Shqiptari thotë se ishte shoku i tij grek që vendosi për ta hedhur trupin në det. Të njëjtën gjë deklaron edhe 21-vjeçari. /BN/
