Kryeministri Edi Rama ka thirrur në një takim 4 deputetët socialistë, të cilët janë mandatuar si pjesë e një komisioni për Shkodrën, pas largimit të Valdrin Pjetrit si koordinator politik për këtë qark.
Musa Ulqini, Arben Pëllumbi, Senida Mesi dhe Luan Harusha, pritet të diskutojnë me kryeministrin Rama, njëherazi edhe kryetar i PS-së, mbi organizimin e strukturave në këtë qark, veçanërisht në Bashkinë e Shkodrës.
Pas problemeve që pati me ligjin për dekriminalizimin, Valdrin Pjetri u tërhoq qoftë si kryebashkiak i Shkodrës, i dalë fitues nga votimet e 30 qershorit, ndërsa Edi Rama urdhëroi një riorganizim total të strukturave të partisë, por njëherazi kërkoi edhe dorëheqjet e drejtuesve të institucioneve lokale dhe zëvendësimin e tyre me kandidate femra.
Lidhur me ecurinë e detyrave, që i ka caktuar komisionit politik, ku përfshihet edhe organizimi i zgjedhjeve të brendshme në PS, Rama ka mbledhur në selinë e kësaj partie 4 deputetët që pritet të raportojnë mbi ecurinë e procesit.
Nga momenti që Rama kërkoi dorëheqjen e drejtorëve të institucioneve, 9 prej tyre i janë bindur urdhërit, ndërsa deri më tani janë komanduar drejtues të rinj.
Strukturave u është kërkuar që për çdo pozicion të propozojnë 3 kandidatë, por ankesat në drejtim të kreut të PS-së, kanë të bëjnë me ndikimet dhe influencat e deputetëve për përzgjedhjen e kandidaturave.
Mësohet se në drejtim të kreut socialist janë drejtuar shqetësime nga organizatat dhe strukturat vendore të PS-së, çka duket kanë krijuar përplasjet e rradhës jo vetëm mes tyre dhe deputetëve, por edhe mes vetë ligjvënësve.
Për qarkun e Shkodrës, shqetësimet janë se influencën më të madhe e ka deputeti Tom Doshi, i cili edhe pse nuk është pjesë e grupit parlamentar socialist, ka pothuajse nën kontroll çdo propozim.
