Sokol Ballës, moderatorit të emisionit “Real Story” duket se nuk i del inati me Presidentin Ilir Meta, pas përplasjeve që kanë pasur në distancë mes tyre.
Mbrëmjen e sotme, në emision është diskutuar situata në Kosovë pas zgjedhjeve të zhvilluara dje, ku Vetëvendosja u shpall si fituese, ndërsa LDK u rendit e dyta me një diferencë të vogël votash.
Arbër Zaimi, i ftuar në emision, solli në vëmendje deklaratën e analistit Baton Haxhiu, i njohur si mbështetës i linjës së Presidentit Hashim Thaçi në Kosovë dhe Kryeministrit Edi Rama në Tiranë.
“Batoni tha para 2 javësh se nëse fiton VV do mbyll tv-në”, u shpreh Zaimi.
Por i menjëhershëm ishte reagimi i Sokol Ballës, i cili tha “Batoni nuk është Ilir Meta. Këtu tek ne nuk e japin ata që janë zgjedhur, Batoni nuk është i zgjedhur”.
Balla, i kërkoi pak ditë më parë Presidentit Ilir Meta të mbajë fjalën dhe të japë dorëheqjen, duke pretenduar se raporti paraprak i Venecias, shkruante se Kreu i Shtetit ka shkelur kushtetutën në rastin e shtyrjes së zgjedhjeve vendore të 30 qershorit.
