Një 31-vjeçar u arrestua mbrëmjen e djeshme nga policia e Kukësit pasi u kap duke transportuar drejt Kosovës 25 shtetas nga vendet e Lindjes së Mesme.
Në kuadër të operacionit të koduar “Emigranti” u vu në pranga i riu me iniciale T.Ll. për veprën penale “Ndihma për kalim të paligjshëm të kufijve”.
“Shërbimet e Policisë Kufitare Morinë në zbatim të planit të masave për goditjen e veprimtarisë kriminale të trafikimit të qenieve njerëzore, dhënies ndihmë për kalim të paligjshëm të kufirit, kundrejt fitimit, personave nga vendet e Lindjes së Mesme, të cilët kanë si destinacion final vendet e BE-së, gjatë mbrëmjes së djeshme kanë goditur një tjetër rast të tentativës për kalim të paligjshëm të kufirit, në vendin e quajtur ‘Nënkalimi Rexhaj’, në afërsi të PKK dhe kanë bërë ndalimin e automjetit tip fugon, me drejtues shtetasin T. LL., 31 vjeç, banues në Lezhë. Gjatë kontrollit në automjet, u konstatuan 25 shtetas të huaj irakianë, iranianë dhe sirianë, të cilët nuk dispononin dokumente identifikimi dhe do të kalonin kufirin në mënyrë të paligjshme. Më pas është njoftuar Seksioni për Hetimin e Trafiqeve në DVP Kukës, ku pas përfundimit të veprimeve procedurale u bë arrestimi në flagrancë i shtetasit T.Ll, 31 vjeç, banues në Lurth, Mirditë, për veprën penale ‘Ndihma për kalim të paligjshëm të kufijve’, si dhe u referuan materialet për veprime të mëtejshme në Prokurorisë e Rrethit Gjyqësor Kukës”, njoftoi policia.