Kryeministri Edi Rama tha se më shqip se Komisioni i Venecias lidhur me marrazinë që i parapriu zgjedhjeve të 30 qershorit nuk ka folur askush.
Në studion e “Real Story”, Rama tha se Venecia konfirmoi deklarimet e tij të mëparshme, lidhur me mbajtjen e zgjedhjeve më 30 qershor, megjithëse disa parti vendosën të mos marrin pjesë.
Përsa i takon dekretit për anullimin e zgjedhjeve më 30 qershor, Rama tha se ishte një akt ekstrem që mund të kishte pasoja të rënda.
“Venecia konfirmoi se kemi të bëjmë me një shkelje të Kushtetutës, ndërsa institucionet shqiptare do të vendosin se sa e rëndë ose jo ishte kjo shkelje”, tha Rama.
Kryeministri tha se nuk do të dëshironte të harxhonte kohën duke u marrë me Ilir Metën.
“Të gjitha aspektet që lidhen me Presidentin varen dhe janë në dorën e komisionit hetimor”, tha Rama, duke shtuar se “ka gjëra më të rëndësishme për të diskutuar sesa për t’u marrë me Ilir Metën”.
Rama tha se shumica e fortë nuk nxitoi të ekzekutonte shkarkimin e Metës, por iu drejtuam Venecias.