Ish-ministri i Drejtësisë dhe njohësi i Kushtetutës Eduard Halimi ka komentuar opinioni paraprak të Komisionit të Venecias, sipas të cilit Presidenti Ilir Meta ka tejkaluar kompetencat lidhur me shtyrjen e datës së zgjedhjeve, por kjo nuk përbën shkelje Kushtetuese që mund të shkarkohet.
Halimi shprehet për Syri TV se “tejkalim i kompetencës” nuk ekziston, ndërsa shton se opinioni i Komisionit të Venecias nuk e thotë në asnjë paragraf të sajin se, cilin nen apo paragraf të Kushtetutës ka shkelur presidenti i Republikës Ilir Meta.
“Termi tejkalim nuk njihet nga Kushtetuta. Në fjalorin shqip shqip, ka të bëjë me tejkalim shpejtësie, apo ti marrësh kompetencat dikujt tjetër. Sipas Kushtetutës, i vetmi institucion, është Presidenti.
Shkelje, në bazë të fjalorit, do të thotë të dhunosh një nen apo paragraf të Kushtetutës. Nga ajo që kam lexuar unë, nuk gjej një cilësim të tillë, që presidenti i Republikës, me shtyrjen me 100 ditë të zgjedhjeve të ketë shkelur një nen apo paragraf të Kushtetutës. Për sa kohë nuk kemi shkelje, nuk mund të flasim për shkelje të vogël apo të madhe”, shprehet Halimi.
Ish-deputeti thekson se Komisioni i Venecias nuk e ka në tagrin e saj të gjykojë proceset zgjedhore, pasi një gjë të tillë mund t’a bëjë vetëm OSBE/ODIHR.
© SYRI.net
