Reformimi i administratës shtetërore, bazuar në udhëzimin e Kryeministrit Edi Rama, të disa javëve më parë, por edhe zgjedhjet e brendshme në parti, ishin në qendër të mbledhjes së Rajonit të Shqipërisë së mesme, ku përfshihen Durrësi, Elbasani dhe Tirana.
Mbledhja është drejtuar nga kreu i grupit parlamentar të PS-së, Taulant Balla, për shkak të mungesës së Edi Ramës, që ndodhet jashtë vendit.
Mësohet se gjatë takimit, Balla ka kërkuar respektimin e afateve të përcaktuara përsa i takon zgjedhjeve të brendshme në PS, por edhe kritereve në përzgjedhjen e kandidaturave për kryetarë të Organizatave Socialiste. Po kështu është kërkuar zbatim rigoroz të udhëzimeve lidhur me emrat që do të propozohen për drejtimin e institucioneve në nivel lokal.
Mësohet se në këtë mbledhje ishin të pranishëm drejtuesit e qarqeve dhe koordinatorët.
Kryeministri Edi Rama ka kërkuar dorëheqjet e drejtuesve të institucioneve lokale, që varen nga ato qendrore, dhe emërimin në krye të tyre të kandidaturave gra.
Ky proces vijon, ndërsa ka krijuar përplasje në rradhët e socialistëve, për shkak të influencave të deputetëve dhe kryebashkiakëve, që siç duket kërkojnë të kenë nën kontroll disa nga institucionet që konsiderohen mjaft të rëndësishme në nivel lokal, bashkish apo qarku.
Për çdo vend vakant, sipas udhëzimeve, duhet të propozohen deri në 3 kandidatë, por në disa raste ka pasur propozime të mbi 10 kandidaturave.
