Elisa Spiropali, ministre e Shtetit për Marrëdhëniet me Parlamentin, ka reaguar pas raportit paraprak të Komisionit të Venecias, lidhur me çështjen e Presidentit Ilir Meta, përsa i takon anullimit të zhvillimit të zgjedhjeve lokale në 30 qershor dhe caktimit të datës 13 tetor si ditën kur këto zgjedhje duhej të mbaheshin.
Venecia në raportin paraprak e cilëson dekretin e Metës si tejkalim kompetencash, por jo si një shkelje Kushtetuese që mund të përbënte një indicie për shkarkimin e tij nga posti i Presidentit.
Gjithsesi duket se mazhoranca do të vijojë procesin e hetimit parlamentar ndaj Kreut të Shtetit, duke vlerësuar të gjitha elementët që Komisioni i Venecias ka përcaktuar.
“Procesi ligjor ka nisur, Komisioni i Venecias ishte shumë i qartë për atë që deklaroi deri në detaje. Është analiza se ku konsistoi në kapërcimet dhe shkeljet e Presidentit të Republikës.
Komisioni hetimor do të vazhdojë sipas procedurës, duke vlerësuar të gjitha elementët që dhe Komisioni i Venecias ka përcaktuar, ne jemi të vendosur që si maxhorancë dhe si Palament të mbrojmë ligjshmërinë në vend.
Ligjin nuk mund ta shkelë një qytetar i thjeshtë, nuk mund t’a shkeli mbi të gjitha Presidenti i Republikës, i cili duhet të jetë garant i ligjit dhe garant i unitetit të popullit”, tha Spiropali.