Aleanca për Mbrojtjen e Teatrit ka depozituar një padi penale ndaj nënkryetarit të Bashkisë së Tiranës, Arbjon Maznikut dhe biznesmenit Shkëlqim Fusha lidhur me skandalin e shpenzimeve në një hotel në Spanjë, ku zyrtarit të bashkisë i kishte paguar hotelin, një faturë 900 euro, kompania që pretendoi të merrte truallin për ndërtimin e Teatrit të ri Kombëtar dhe disa kullave, rreth tij.
Me një shkresë, artistët i kërkojnë Prokurorisë së Përgjithshme, që pa cënuar sekretin hetimor, të japë informacion në lidhje me mënyrën e trajtimit të materialit, raporton Faxweb.
Prokuroria e Përgjithshme i ka dërguar një shkresë në adresë të Prokurorisë së Rrethit Gjyqësor Tiranë që të marrë në shqyrtim çështjen duke argumentuar se ka kompetencën lëndore dhe territoriale.
Nga ana tjetër një tjetër shkresë e ka dërguar në adresë të aleancës për Mbrojtjen e Teatrit ku thekson se i ka kërkuar Prokurorisë së Rrethit Gjyqësor Tiranë marrjen në shqyrtim dhe dhënien e informacionit mbi trajtimin e materialit të depozituar nga artistët në kallëzimin penal.
