Sot në mbrëmje, në orën 19:00 luhet një nga duelet më të “zjarrta” të kampionatit shqiptar, derbi i kryeqytetit Tirana-Partizani. Ndryshe nga vitet e fundit, përveç se do vendoset se cilat ngjyra do të “sundojnë” kryqytetin deri në derbin e ardhshëm, këtë sezon është dhe një duel titulli.
Në kampin bardheblu, kërkojnë me çdo kusht fitoren, për të thyer tabunë e pesë viteve të fundit, ndërsa Partizani zbret në fushë si kampioni në fuqi, por jo si ekipi favorit.
“Demat” kanë shfaqur paraqitje të dobëta në ndeshjet e fundit në kampionat, shumë të prekshëm në mbrojtje dhe shumë pak efikas përpara porte, ndërsa bardheblutë edhe pse në përballjen e fundit ndaj Kukësit pësuan humbje, janë në top formë duke u rikthyer fuqishëm në garë për titullin kampion.
Trajneri i bardhebluve, Ardjan Mema ka në dispozicion grupin e plotë dhe pritet të rreshtojë në fushë nga minuta e parë 11 lojtarët më në formë.
Rikthehet në kudrat kapiteni Ilion Lika ndërsa përpara tij në rreshtimin me katër pritet të zbresin nga minuta e parë nga e djathta në të majtë, Kërçiku, Vangjeli, Osmani dhe Hoxhallari. Mesfusha gjithashtu është “blind” me Kobina, Batha, Torasa dhe Kale. Edon Hasani pritet të mbështes nga pranë sulmuesin e vetëm Majkëll Ngoo.
Në konferencë për shtyp trajneri Mema theksoi se ekipi është në një gjendje të mirë fizike dhe se këtë sfidë po e presin me kujdes të vetëdijshëm se çfarë përfaqëson dhe sa e rëndësishme është të mos kalojnë në eufori.
Ndërsa në kampin e kuq, gjërat nuk po shkojnë ashtu siç duhet. Trajnerin Franko Lerda në asnjë moment nuk ka ngrohur ambientin e kuq dhe derbi pritet të jetë një pikë kthese për sezonin e Partizanit, një fitore përballë Tiranës do të rikthente gjërat në normalitet. Lajmi pozitiv është rikthimi i Boldor, mbrojtësi rumun është thelbësor për skemën me 3 që praktikon italiani, sëbashku me Bitrin dhe Belica pritet të formojnë prapavijën. Me grupin ka punuar dhe Bruno Telushi i cili është lideri absolut i mesfushës së kuqe, sëbashku me Melon, Romeron dhe Trashin do të jenë “diga” përpara mbrojtjes. Esat Mala, Solomon dhe Asani do të formojnë treshen e sulmit.
Në konferencën për shtyp, Lerda nuk preferoi ta shoh si ndeshjen e tij të fundit në rast humbje, thjesht për italianin është një ndeshje shume e rëndësishme të cilën dëshiron të fitoj, më pas nuk është ai i cili vendos se çfarë ndodh jashtë fushe.
