Lulzim Basha, kryetar i PD-së ka thirrur sot një mbledhje me ish-deputetët e opozitës, si dhe anëtarët e kryesisë së kësaj partie.
Takimi ka nisur rreth orës 11:00 dhe ai është në vijim të diskutimeve mbi riorganizimin e strukturave të PD-së, aksionit politik që do të ndërmerret dhe zgjidhjes së krizës politike në vend.
Takimi vjen një ditë pas takimit të Bashës me Kolegjin e Kryetarëve.
“Vendi është në një krizë të thellë shumëplanëshe dhe detyra e PD dhe opozitës është të angazhohet seriozisht për të qenë pranë njerëzve dhe për t’i hapur rrugë perspektivës europiane të Shqipërisë. Opozita ka dhënë propozimet e veta për zgjidhjen e krizës në vend, që kalon përmes zgjedhjeve të njëkohshme parlamentare dhe lokale të parakohshme, me qeveri tranzitore që garanton standardet për zgjedhjet e lira dhe të ndershme”, ka deklaruar kreu demokrat.
Pranë Partisë Demokratike do të ngrihet shtabi qëndror elektoral dhe politik, shtabe që do të shtrihen në mënyrë piramidale në të gjithë vendin.
Puna do të përqëndrohet në planin e ofrimit të zgjidhjes për qytetarët, denoncimeve për aferat korruptive dhe kriminale të Qeverisë, bashkimi i faktorëve dhe aktorëve me potencial njerëzor dhe elektoral pranë PD, si dhe hapja e partisë për njerëz me integritet profesional e moral.
