Është zbuluar biznesmeni që ishte pritësi i 137 kilogramëve kokainë në portin e Durrësit, në kuadër të një operacioni ndërkombëtar, me pjesëmarrjen dhe të agjentëve të DEA-s amerikane.
Ai është Gentian Malindi, i arrestuar më parë dhe për një sasi prej 500 kilogramë hashash, por i lirua më tej nga gjykata.
Malindi iu ka kërkuar dy punonjësve të portit të Durrësit që të merrnin drogën në kontenier, sipas deklaratës së njërit prej tyre. Por kur ka kuptuar se disa prej tyre kishin paketim të dyshimtë ka braktisur mjetin dhe i ka shpëtuar policisë.
Një prej punonjësve të portit që është arrestuar Ardian Bega, ka thënë gjatë marrjes në pyetje se biznesmeni Malindi u ka thënë që të hapnin kontejnerin dhe më pas të merrnim sasinë e drogës prej aty.
“Pasi e morëm hapëm pakot dhe Gentian Malindi kuptoi që kjo nuk ishte mbështjellja që kishim kërkuar, aty kuptuam që është kurth dhe po ndiqeshim nga policia dhe më pas i hodhëm pakot afër Shkëmbit të Kavajës dhe u larguam”, ka thënë Bega në dëshminë e tij.
Bashkë me Begën, personi tjetër i arrestuar është Altin Mislihaka. Për të dy Gjykata e Krimeve të Rënda dha sot masën e sigurisë së arrestit me burg. Bashkë me Malindin, në kërkim policor, ata akuzohen për veprat penale ‘Trafiku ndërkombëtar i lëndëve narkotike, e kryer në formën e grupit të strukturuar kriminal’.
/Boldnews.al/
