Partia Demokratike propozoi sot përmes ekspertit të saj, Ivi Kaso, ngritjen e një strukture me përfaqësim ndërkombëtar, një përfaqëues nga opozita dhe një nga Kuvendi, për realizimin e reformës zgjedhore.
Propozimi i Kasos në emër të opozitës së bashkuar shkaktoi reagimin e menjëhershëm nga ajo që quhet opozita e re, dhe që përfaqësohej në tryezën e OSBE-së për reformën zgjedhore nga Rudina Hajdari, Ralf Gjoni, Myslym Murrizi apo Kujtim Gjuzi.
Por duket se ky propozim është mirëpritur deri diku nga Rilindja.
Bashkëkryetari i Komisionit aktual për Reformën Zgjedhore, Damian Gjiknuri tha se është gati të rishikojë pozicionin e tij në drejtim të komisionit, pra të japë edhe dorëheqjen pasi të komunikojë me kreun e PS Edi Rama.
“Unë jam aty të përfaqësoj interesat e PS, nuk kam pushtet të vecantë, vetëm rendin e fjalës madje edhe atë e kam të vështirë ndonjëherë. Unë jam i gatshëm ta rishikoj pozicionin tim, të gjithë politikanët akuzohen e rëndësishme është të përfaqësojme partitë tona politke e sa kohë jemi të lirë s’mund të kondicionohemi.
Mekanizma jashtë sistemit parlamentar e vështirë të ketë sepse do miratohet ne fund nga Parlamenti, por nëse PD kërkon të kanalizojë propozimet e saj, ka mekanizma dialogu që ne nuk i refuzojmë apriori por duam të mësojmë më shumë ç’ka kanë parasysh ata me këtë strukturë të re”, tha Gjiknuri.
