Kërcënohet në burg dëshmitari i vrasjes së ish-policit Santiago Malko

Denoncimi vjen nga avokati i Blendi Teta, që i pyetur nga Top Channel shpjegon se menjëherë pas masës së sigurisë, të vendosur nga Gjykata, 39 vjeçari është transferuar për kushte sigurie më të forta, jo në paraburgimin e Tiranës por në një qytet tjetër. Por edhe aty atij i është dërguar një mesazh paralajmërues.

“Familjarët pretendojnë  që është çuar atje për ta eleminuar fizikisht. Edhe vetë Blendi, ditën e  shtunë, kur ra tërmet, në mëngjes ka shfaqur ankth për arsye se i është çuar një mesazh që do të eleminojmë. Ne i kemi kërkuar prokuroit të çështjes marrjen nën mbrojtje të tij dhe ai ka thënë që është në masa të rrepta sigurie , por ndërkohë që ky person ka marrë një njoftim të tillë ne nuk e shohim që janë në atë shkallë masat e sigurisë “ tha avokat Bashkim Sulstarova.

Avokati thotë se klienti i tij ishte i trembur edhe para prangosjes dhe për këtë shkak është vetëdorëzuar.

“Nuk e dimë se nga cilët persona është e rrezikuar jeta e tij. Shteti ose duhet ta rikthejë në Tiranë në një masë sigurimi ose atje, nuk e di se si do të gjykohet. Por përderisa burgu i Fushë-Krujës është burg i sigurisë së lartë dhe ka shkuar sinjalizimi për eleminim fizik, le të themi që nuk i plotëson kushtet. Ne na intereson sigurimi i jetës i të ndaluarit”, shtoi Sulstarova.

Vrasja e ish-policit, Santjago Malko, që thuhet se është mik i Ervis Martinit ka vënë policinë dhe Prokurorinë përpara shumë pistash hetimore, jo vetëm për ngjarje të ndodhura në Tiranë por edhe në Durrës.

Por pas këqyrjes se dhjetëra kamerash të sigurisë, hetuesit kuptuan se viktima ishte ndjekur hap pas hapi nga dy makina, në njërën prej të cilave më pas u mësua se ishte edhe Teta.

Rrëfimi i mëpasshëm i 39-vjeçarit nxori edhe emra të tjerë në skenë, mes tyre edhe dy vëllezërit Duka si edhe një vlonjat, tashmë të shpallur në kërkim.

Vëllezërit Duka sipas policisë kanë administruar gjithashtu lojëra fati. Ndërkohë që Blendi Teta i cili ka rrëfyer dijeninë e tij mbi survejimin e shënjestrës, akuzohet se ka kryer veprime që pengojnë zbardhjen e të vërtetës. ndërkaq Prokuroria nuk jep asnjë të dhënë nëse të dyshuarit të vetëm të ngjarjes, i është afruar apo jo statusi i bashkëpunëtorit./TCH