Shoferi i mjetit me të cilin udhëtonin katër gratë që mbetën viktimë e një aksidenti të rëndë ndodhur të hënën në Elbasan, është arrestuar nga policia, e cila thotë se 36-vjeçari akuzohet për veprën penale “Shkelja e rregullave të qarkullimit rrugor”.
Drejtuesi i makinës “Seat”, ka marrë gjithashtu plagë të rënda dhe ndodhet në Spitalin e Traumës në Tiranë për ndihmë të specializuar mjekësore. Babai i një djali të mitur, sipas Policisë Rrugore, është shpëtuar nga rripi i sigurimit që mbante në momentin e përplasjes së fortë, që rezultoi fatale për katër pasagjeret në makinën e drejtuar prej tij.
Njoftimi i policisë sot:
Në vijim të informacionit të dhënë ditën e djeshme se në aksin rrugor Elbasan – Peqin, në fshatin Papër, shtetasi G. K., 36 vjeç, duke drejtuar mjetin tip “Seat”, si rezultat i lagështirës në rrugë ka humbur kontrollin mbi mjetin dhe për pasojë ka dalë në korsinë tjetër të lëvizjes, ku është goditur nga mjeti tip “Skoda”, me drejtues shtetasin O. Sh., 39 vjeç, banues në Tiranë dhe më pas ky mjet është goditur nga mjeti tip “Ford”, me drejtues shtetasin E. R., 32 vjeç, banues në Fier dhe për pasojë kanë humbur jetën pasagjerët që ndodheshin në mjetin tip “Seat”, shtetaset: F. A., 64 vjeçe, banuese në Gramsh, J. K., 30 vjeçe, banuese në Tiranë, F. H., 69 vjeçe, banuese në Cërrik, L.H., 57 vjeçe, banuese në Cërrik, si dhe mbeten të plagosur 2 drejtuesit e mjeteve, shtetasit G. K., dhe O. Sh., të cilët janë jashtë rrezikut për jetën, ju informojmë se:
Specialistët e Qarkullimit Rrugor në DVP Elbasan, arrestuan në flagrancë shtetasin: G. K., 36 vjeç, banues në Tiranë, për veprën penale “Shkelja e rregullave të qarkullimit rrugor”.
Ngjarja
Një 68-vjeçare, pasi kishte marrë lajmin për ndarjen nga jeta të bashkëshortit të saj, i cili prej disa ditësh gjendej në Tiranë për mjekim, bashkë me disa të afërme, u nis për në banesën e saj në Gramsh, për organizimin e ceremonisë mortore të burrit.
Në afërsi të fshatit Papër të aksit rrugor Elbasan-Peqin, automjeti me të cilin ato udhëtonin u përfshi në një aksident. Përplasja e makinës “Seat” ishte fatale për 68- vjeçaren dhe tri të afërmet e saj, ndërsa shoferi u plagos rëndë.
Shkak për aksidentin e rëndë dyshohet se është bërë lagështia në rrugë, gjithashtu edhe shpejtësia e lartë. Drejtuesi i automjetit, Gëzim Kotorri, e ka pasur të pamundur të rimarrë kontrollin e makinës duke bërë disa rrotullime në rrugë dhe duke kaluar në pjesën e korsisë, ku automjetet lëviznin në drejtim të kundërt.
Pikërisht nga një makinë “Skoda” që po i vinte përballë ka ndodhur dhe përplasja më e fortë, ndërsa në aksident është përfshirë dhe një automjet tjetër tip “Ford”. Aksidenti mësohet se ka ndodhur rreth orës 15:20, ku nga përplasja e fortë, makina “Seat Ibiza” doli jashtë rrugës duke kaluar dhe barrierën mbrojtëse.
Menjëherë është tentuar që të aksidentuarve t’u jepet ndihma e parë nga kalimtarë të rastit, të cilët kanë ndaluar mjetet e tyre, ndërsa në vendin e ngjarjes kanë mbërritur pesë autoambulanca nga Elbasani dhe Policia. Në pamundësi për të nxjerrë trupat e pajetë nga mjeti, për shkak të shtypjes së fortë të makinës në anën e pasagjerit, në ndihmë ka mbërritur edhe mjeti i zjarrfikëses ku efektivët janë angazhuar për nxjerrjen e trupave.
Tri prej grave u deklaruan të vdekura në vendin e ngjarjes, ndërsa 30-vjeçarja ndërroi jetë disa orë më pas në spital, për shkak të plagëve të rënda që kishte marrë. /Panorama/
