Ambasadori i OSBE-së, Bernd Borchardt dhe ai i delegacionit të BE-së, Luigi Soreca, pritet të zhvillojnë një takim me kreun demokrat Lulzim Basha.
Takimi do të mbahet në selinë e PD-së, në orën 15:00, një orë pas nisjes së mbledhjes së Kryetarit të PD-së me partitë aleate.
Në këtë tryezë pritet të merret një vendim përsa i takon tryezës që ka thirrur OSBE për nisjen e reformës zgjedhore.
Nuk dihet nëse opozita e bashkuar do të marrë pjesë në këtë tryezë apo jo, por duket se dy diplomatët janë angazhuar në takime për të bindur drejtuesit e opozitës që të jenë pjesë e kësaj tryeze.
Gjatë javëve të fundit opozita ka denoncuar me fakte dhe dokumente disa prej kryebashkiakëve të Rilindjes që morën mandatet në votimet e 30 qershorit. Mes emrave të denoncuar ishin kryebashkiaku i Shkodrës, ai i Vaut të Dejës dhe i Vorës.
Reforma zgjedhore është një nga kushtet për të çuar përpara integrimin europian dhe pjesëmarrja e opozitës është tregues i vullnetit të mirë të saj, për të mos u bërë pengesë për negociatat.
Nuk përjashtohet mundësia që përfaqësia e opozitës në këtë tryezë të jetë në nivel ekspertësh.
