Valbona Sako, kryetare e Bashkisë së Durrësit, ka zgjedhur të falenderojë kolegun e saj kryebashkiak, Erjon Veliaj, por jo Kryeministrin Edi Rama.
Pavarësisht se Rama një ditë më parë mori rolin e protagonistit në organizimin e strukturave për menaxhimin e situatës, pavarësisht se pohoi se ishte marrë personalisht deri pas mesnate për të hapur dyert e stadiumit dhe ndriçuar vendin, për kryebashkiaken e Durrësit meritat i shkojnë Veliajt.
Reagimi i Sakos në rrjet ka të bëjë me angazhimin e strukturave dhe ndihmave për përballimin e situatës pas tërmeteve të së shtunës.
“E gjithë vëmendja dhe përkushtimi jonë shkon sot për familjet e prekura nga tërmeti.
Evidentuam dëmet në cdo Njësi Administrative
Do të vijojmë me intensitet në ditët në vazhdim për të filluar më pas nga riparimet.
Një falenderim dhe për Erionin dhe Këshillin Bashkiak të Tiranës për ndihmën e madhe financiare që po i mundësojnë Bashkisë Durrës
Do ta kalojmë këtë situatë të gjithë bashkë”, shkruan Sako në rrjet.
E ndërsa një ditë më parë, Edi Rama, u angazhua në mbledhje e takime, vizita dhe inspektime në Durrës, madje urdhëroi shpërndarjen e deputetëve, ministrave dhe kryebashkiakëve të tjerë, në zona të ndryshme të qarkut të Durrësit, duket se kryebashkiakja e dalë nga votimet e 30 qershorit, ka vlerësuar Veliajn për fondin 20 mln lekë që do të kalojnë nga Buxheti i Bashkisë së Tiranës drejt asaj të qytetit bregdetar.
Kjo është hera e parë që ndodh që një i zgjedhur i Rilindjes apo zyrtar i saj shpreh falenderime për kryebashkiakun e Tiranës, duke shmangur Kryeministrin.
Veliaj është konsideruar si pasardhës i Ramës në krye të PS-së, madje për herë të parë, pak ditë më parë kur u pyet nëse do të pranonte postin e kryeministrit u shpreh “nuk e di”.
