Lëkundjet e tërmetit, të regjistruara dje, kanë dëmtuar dhjetra banesa, kryesisht në qarqet Durrës dhe Tiranë.
“News24” ka sjellë dëshmi shokuese nga Durrësi, atje ku ishte edhe epiqendra e tërmetit me magnitudë 5.8 të Shkallës Rihter, që u pasua nga 300 lëkundje të tjera.
Gazetari Osman Stafa raportoi nga një pallat i dëmtuar në Durrës, në të cilin është rrezikuar seriozisht jeta e shumë qytetarëve, për shkak se kanë rënë depozitat e ujit.
Sipas gazetarit, depozitat e ujit ishin vendosur mbi pallat, por nga tërmeti i fuqishëm ato kanë rënë në tokë, duke rrezikuar jetën e banorëve, shkruan BW.
Pallati është ndërtuar në vitin 1993 dhe ka pësuar dëmtime të shumta, kati i parë dhe i pesti janë më të dëmtuarit, por edhe dëmet e tjera. E pyetur nga gazetari Stafa, një banore e këtij pallati tregoi tmerrin, duke thënë se i ka shpëtuar Zoti.
“Ka qenë tmerr i paparë, kemi shpëtuar nga depozita e ujit, që desh na ra në tokë. Na ka ruajtur Zoti, nuk kam çfarë flas, nga ajo që kam parë dje. Thyenin qafën duke vrapuar për të dalë jashtë qytetarët”, tha ajo.
