Mediat ndërkombëtare kanë pasqyruar lajmin mbi tërmetin e fortë që u regjistrua pasditen e së shtunës në territorin shqiptar, shumë pranë qytetit të Durrësit. Tërmeti me magnitudë 5.8 i Shkallës Rihter, me intensitet 7.5, shkaktoi dëme të shumta materiale, kryesisht në Durrës dhe Tiranë, por edhe panik te qytetarët.
Mediat gjermane shkruajnë se janë mbi 100 të plagosur dhe qindra godina të dëmtuara.
Por sa rrezikohet Shqipëria?
ZDF ka publikuar deklaratën e një eksperteje nga Instituti i Gjeoshkencave dhe Burimeve Natyrore në Gjermani.
Mesdheu është një nga rajonet më aktive për tërmetet në Evropë. Atje, pllaka kontinentale afrikane dhe euroaziatike lëvizin drejt njëra-tjetrës, duke shkaktuar tensione që shkarkohen pa masë përmes tërmeteve.
Për më tepër janë edhe të ashtuquajturat mikropllaka që lëvizin në Adriatik.
Sidoqoftë, edhe tërmete si ato të shtunës nuk janë të zakonshëm në Shqipëri, e cila ndodhet në brigjet e Adriatikut.
Kohët e fundit pati tërmete të ngjashme të fuqishme më 1 qershor në Korçë, në juglindje të vendit. Aty pati një tërmet me madhësi 5.2 ballë. Edhe atëherë u shënuan dëme të konsiderueshme.
