Kryeministri Edi Rama urdhëroi sot deputetë, ministra e kryebashkiakë, që të angazhohen në përballimin e situatës së krijuar në qarkun e Durrësit, pas tërmeteve të ditës së djeshme.
Nga mesnata e djeshme kur zhvilloi një mbledhje të jashtëzakonshme qeveria, Rama e nisi ditën sot e një takim me grupin e emergjencave, më pas me deputetët dhe prefektët, për të vijuar në Durrës në mbledhjen e organizuar në Prefekturë.
Këtu ai ndau edhe grupet e punës për të gjithë qarkun e Durrësit, ku veç prefektit, që e kritikoi lidhur me mefshtësinë e treguar pasditen e së shtunës, dhe kryebashkiakes Valbona Sako, e cila ndjehej në siklet kur fliste apo raportonte në prani të Kryeministrit, Rama bëri ndarjen e deputetëve dhe kryetarëve të bashkive të tjera, që do të ndihmojnë ose do të drejtojnë grupet e punës në terren për evidentimin e banesave.
Mes emrave që përfshihen në grupet e punës është edhe ai i Tërmet Peçit, kryebashkiakut të Tepelenës. Ky i fundit bashkë me kolegë të tjerë bashkiakë, do të mbulojë zonën e Ishmit.
Duket se pas tërmetit të një dite më parë që krijoi dëme dhe panik te banorët e qytetit bregdetar, por jo vetëm, Rama ka menduar që t’i kundërpërgjigjet fenomenit natyror me Tërmetin e Tepelenës.
