Dëmet nga tërmeti, fshatrat e Durrësit më të prekurit/VIDEO

Ministri i Brendshëm Sandër Lleshaj ishte në zonat periferike të Durrësit dhe në disa fshatra, tek familjet e prekura nga pasojat e tërmetit, për t’u njohur në detaje mbi problemet që kishin gjithsecili. Me këtë rast ai siguroi shtetasit për mbështetjen e qeverisë në këtë moment të vështirë dhe premtoi përkrahje edhe për më pas. Lleshaj tha gjatë vizitës në Porto Romano se praktikisht e kishte urdhëruar një kryefamiljar të zhvendosej në ambjentet e Shtëpisë së Pushimit të Ministrisë së Brendshme që njihet me emrin Kavalishenca. Ministri shtoi se për familjet e prekura nga tërmeti do të shfrytëzohen të gjitha mundësitë për t’u riparuar shtëpitë e dëmtuara dhe më pas për t’u dhënë çdo përkrahje të mundshme në përballimin e jetesës.

Gjatë vizitës në banesën e një shtetasi në Karreç, Ministri Lleshaj u shpreh:

“Ne erdhëm sot për të vizituar disa nga familjet më të prekura në qarkun e Durrësit. Tani këtu jemi në Karreç tek familja Leba, që është një ndër rastet e prekura rëndë, por jo  i vetëm.

LEXO EDHE  Pas Ramës, edhe Cakaj paralajmëron BE/ Bllokimi i negociatave, ju ul rolin në Rajon

Para se të vini këtu patëm mundësinë për të vizituar disa familje të tjera në Porto Romano, në Metallaj, familje të prekura shumë nga pasojat e këtij tërmeti. Por edhe nga pasoja të tjera, të varfërisë, të gjendjes ekonomike të tyre.

Kemi marrë masa të shpejta për të ndërhyrë në të gjitha rastet ku jemi ndeshur me këto pasoja. Në Porto Romano dhe Metallaj morëm masa për t’i zhvendosur drejt Kavalishencës familjet e prekura, që ishin në kushte shumë të vështira.

Ndërsa në rastet e tjera po marrim masa për të sjellë çadra dhe ndihma në mënyrë që këta të mund të kalojnë situatën aktuale dhe pastaj të vazhdojmë me fazën tjetër që do të jetë faza e rehabilitimit të shtëpive të dëmtuara”.