Përmes një megaoperacioni, policia e Bergamos ka arrestuar 7 persona nën akuzën e prostitucionit dhe vjedhjes. Gjatë kontrollit janë sekuestruar edhe prona dhe pasuri të patundshme me një vlerë prej 350 mijë euro. Të paktën 10 vajza janë trafikuar nga ky grup kriminal, të cilat ushtronin prostitucionin në provincën Francesca.
Trafikantët e arrestuar merrnin vajza të reja nga Rumania në Itali, duke përfituar kështu të ardhura të majme nga ky biznes i jashtëligjshëm. Grupi kriminal drejtohej nga shqiptarë. Gjithashtu, dyshohet se edhe 5 rumunë janë pjesë e këtij grupi të strukturuar, ku përvec prostitucionit konsiderohen përgjegjës për krime si uzurpim të pronës private, mashtrim me transferta parash dhe falsifikim të dokumentave origjinalë.
Operacioni u bë i mundur falë bashkëpunimit të autoriteteve Italiane me ato Rumune, duke arrestuar 7 persona në Itali, Rumani dhe Austri.
