Prokuroria ka reaguar një ditë pasi Gjykata e Krimeve të Rënda dënoi ish-ministrin e Brendshëm, Saimir Tahiri, me 5 vjet heqje lirie, i cili u konvertua në 3 vjet shërbim prove, me akuzën e shpërdorimit të detyrës.
Mësohet se prokuroria ka vendosur të apelojë vendimin për Tahirin.
“Do ta apelojmë vendimin. Ankimimi i vendimit është detyrim ligjor. Javën e ardhshme do të bëjmë apelimin”, shprehen burime nga Prokuroria.
Ndërkohë një ditë më parë, ish-ministri i Brendshëm, pas shpalljes së vendimit, paralajmëroi se do të apelonte vendimin, duke kërkuar pafajsinë.
Prokuroria akuzonte Tahirin për trafik i narkotikëve kryer në bashkëpunim në formën e grupit të struktuar kriminal; Pjesmarrje në grup të strukturuar kriminal dhe Kryerja e veprës në grup të strukturuar kriminal.
Por gjykata i rrëzoi ato, duke vlerësuar se nuk kishte prova që të mbështesnin këto akuza, por se megjithatë, ishin sipas saj të mjaftueshme për ta dënuar zotin Tahiri për shpërdorim detyre.
