Saimir Tahiri, ish-ministër i Brendshëm, u shpall fajtor nga Gjykata e Krimeve të Rënda për shpërdorim detyre, ndërsa akuzohej nga Prokuroria trafik narkotikësh, pjesëmarrje në organizatë kriminale dhe kryerje veprimesh në kuadër të organizatës kriminale.
Prokuroria kërkoi dënimin e Tahirit me 12 vjet burg, ndërsa Gjykata e dënoi me 5 vjet, dënim që u konvertua në 3.4 vite shërbim prove.
Tahiri pëgjatë pasdites së djeshme ishte në mjediset e Gjykatës, në pritje të vendimit, i cili u njoftua se do të jepej në orën 16:00, por në fakt u shpall rreth orës 22:00.
Ish-ministri i Brendshëm u fiksua nga kamerat dhe fotografët në sallën e gjyqit, ndërsa gjyqtarët shpallnin vendimin. Në një moment ai kishte bashkuar duart dhe dukej sikur po lutej, por më pas për mediat ai sqaroi “unë Zotit i lutem vetëm për familjen time dhe për shëndetin tim, nuk i lutem për gjëra që i kam në dorë vetë, kështu që nuk po lutesha, nuk e di përse i kam mbajtur duart ashtu, ka qene e momentit”.
