Mes tensionit dhe ankthit është duke u pritur vendimi i Gjykatës për ish-ministrin e Brendshëm Saimir Tahiri.
Prej disa orësh gjatë ditës së sotme sytë dhe veshët e gjithë shqiptarëve janë drejt Gjykatës së Krimeve të Rënda në pritje të verdiktit për ish-ministrin Tahiri, nëse do të ketë ndryshim epoke apo jo.
Edhe pse më herët ishte lajmëruar se vendimi i Gjykatës nëse do ta dënojë apo jo Tahirin do të jepej rreth orës 16:00, ende nuk ka asnjë lëvizje, çka ka rritur tension dhe ankthin tek mbështetësit e Tahirit por dhe tek qytetarët shqiptarë që janë në pritje të mësojnë nëse drejtësia do të ndëshkojë të pandëshkueshmit, apo do të vijojë e njëjta histori ku i forti bën ligjin.
Ndërkohë që vetë ish-ministri i brendshëm, Saimir Tahiri, lëshoi dhe disa mesazhe të kodura ditën e sotme, për tu treguar ish-miqve të tij se nëse gjykata e dënon, ai do t’i fundosë të gjithë.