Teksa vëmendja është përqendruar në gjyqin ndaj ish-ministrit të Brendshëm Saimir Tahiri, jeta vazhdon në kampin socialist, ku Tahiri ishte pjesë para se të merrej i pandehur… Kryetari i grupit parlamentar socialist, Taulant Balla është shfaqur në ambientet e një lokali që hapet pikërisht këtë të enjte, në rrugën ku banon ish-kryeministri Sali Berisha.
I veshur me një kostum blu dhe nën shoqërinë e personave të tjerë që i rrinë afër, Balla po i kalon orët e mbrëmjes shumë ndryshe nga ish-kolegu Tahiri.
Ky i fundit ndodhet në ambientet e gjykatës së Krimeve të Rënda dhe pret prej orësh vendimin e treshes gjykuese. Për ish-ministrin, prokuroria ka kërkuar 12 vite burgim për akuzat: “korrupsion të zyrtarëve të lartë”, “trafik të lëndëve narkotike kryer në bashkëpunim” dhe “grup të strukturuar kriminal”.
Sipas akuzës, Tahiri ka garantuar paprekshmërinë e grupit të Habilajve në trafikimin e sasive të mëdha të drogës drejt Italisë.
Si Tahiri dhe avokati i tij kanë këmbëngulur në pafajësi duke u shprehur se prokuroria dështoi të ofronte një provë konkrete në mbështetje të akuzave të ngritura.
Ish ministri i Brendshëm u vu nën hetim nëntorin e vitit 2017, nën dyshimet se kishte lidhje me grupin e vëllezërve Habilaj, kushërinj të tij, të cilët ishin pjesë e një organizate italo-shqiptare e cila trafikonte marijuanë nga Shqipëria drejt Italisë. Hetimet nisën pasi autoritetet italiane goditën këtë organizatë në Catania, ndërsa në përgjimet e kryera, emri i Tahirit përmendej disa herë në bisedat mes trafikantëve.
Prokuroria kërkoi me urgjencë arrestimin e Tahiri, por shumica e majtë, refuzoi kërkesën duke pretenduar se ajo nuk kishte paraqitur asnjë prove. Në maj të vitit të kaluar ish-ministri dha dorëheqjen nga mandati i deputetit. Menjëherë më pas prokuroria kërkoi sërish arrestimin e tij. Tahiri kaloi një periudhë të shkurtër në arrest shtëpie, derisa më pas Gjykata e Apelit lejoi hetimin e tij në gjendje të lirë, hetim i cili u mbyll shkurtin e kaluar.
