Kreu i Partisë Republikane, Fatmir Mediu mbështet sistemin proporcional kombëtar me lista të hapura.
Deklaratën, aleati historik i PD-së, e bëri gjatë një debati në emisionin “Real Story” me avokatin Spartak Ngjela. Ky i fundit e pyeti se cilin sistem mbështet opozita. Mediu u përgjigj se ai preferon sistemin proporcional kombëtar me lista të hapura.
Reforma zgjedhore, sipas raportimeve të mediave gjermane, është një nga kushtet që pritet të vendosë Gjermania për Shqipërinë, si kusht për çeljen e negociatave të anëtarësimit në Bashkimin Europian.
Kryeministri Edi Rama, më herët gjatë kësaj të mërkure i bëri një ftesë kryeopozitarit Lulzim Basha dhe aleatëve të tij, për ulje në bisedime për reformën zgjedhore. Në një prononcim për gazetarët më vonë gjatë ditës, Basha e konsideroi provokim ftesën e Ramës. “Po ne jemi të vendosur dhe reforma zgjedhore ka rëndësinë e saj por zgjidhja e krizës politike kërkon vullnet politik. Letrat e hapura, provokime të tilla si përfshirja e të dyshuarve të dosjes 184 në reformën zgjedhore tregon mungesën e këtij vullneti politik”, tha Basha.
Ndërkohë, mbrëmjen e sotme, aleati i PD-së Nard Ndoka tha se opozita do t’i përgjigjet pozitivisht ftesës së ambasadorit të OSBE, Bernd Borchardt që opozita të marrë pjesë në tryezën për Kodin Zgjedhor. “Për ne është shumë e rëndësishme reforma zgjedhore, nuk është ajo që është shkaktare e krizës. Ne kemi platformën tonë. Sot nuk jemi jashtë parlamentit për Kodin Zgjedhor. Me këtë kod, Rama i ka blerë zgjedhjet. Duhet një ndëshkim i këtyre hajdutëve. Ne do të marrim pjesë në tryezën për Kodin Zgjedhor, por problemi është Rama dhe jo Basha”, sqaroi kreu i PDK-së në një emision televiziv.