Prokuroria për Krime të Rënda kërkon zgjatjen e afateve të hetimit për grupin Bajri.
Kërkesa i është dërguar gjykatës, e cila pritet të vendosë me 20 shtator nëse pranon ose jo kërkesën e prokurorisë.
Operacioni
Më 22 shtator 2018, forcat speciale RENEA, ato të FNSH-së dhe Policia e Shkodrës ndërmorën një operacion që çoi në arrestimin e 11 personave, të dyshuar si të përfshirë në grupin Bajri.
Mes të arrestuarve ishte dhe Safet Bajri, pjesëtar të fisit të tij, Bajri, si dhe ish-kampioni i boksit me Vllazninë, Armir Grimaj.
Paraditen e 22 shtatorit Drejtori i Përgjithshëm i Policisë së Shtetit Ardi Veliu sëbashku me Drejtuesen e Prokurorisë së Krimeve të Rënda Donika Prela dolën në një konferencë për median për të dhënë detaje lidhur me arrestimet e anëtarëve të grupit kriminal “Bajri” dhe operacionit të koduar “Oaz”.
Emrat e te arrestuarve
1. Behar Brajoviq (Bajri) arrestuar në Roterdam, Holandë;
2. Samet Halluni, i arrestuar në Roterdam, Holandë;
3. Ilir Rustemi, i arrestuar në ndërhyrjen e datës 6 shtator në Shkodër;
4. Emrah Plaku, i arrestuar në ndërhyrjen e datës 6 shtator në Shkodër;
5. Astmer Bilali, i arrestuar në ndërhyrjen e datës 6 shtator në Shkodër;
6. Armir Grimaj, arrestuar në Shkodër;
7. Safet Rustemi (Bajri), i arrestuar në Tiranë;
8. Fabiol Rexhepi, i arrestuar në Shkodër;
9. Ismet Idrizi, i arrestuar në Shkodër;
10.Denis Brajoviq, i arrestuar në Tiranë;
11. Klaudio Hoxhalliu, i arrestuar në Tiranë.
Dy në kërkim
Në kërkim u shpallën 2 anëtarë të këtij grupi kriminal, për të cilët Gjykata ka dhënë masën e sigurisë “Arrest me burg”, për shtetasit: E.B., 45 vjeç, dhe N.H., 34 vjeç.
Ku u kryen arrestimet?- Operacioni policor u zhvillua njëkohësisht në Tiranë, Shkodër dhe në Roterdam, Holandë dhe zgjati nga mesdita e së premtes dhe deri në orët e para të mëngjesit të ditës së sotme (22 shtator) .
Behar Brajoviq (Bajri) dhe Samet Halluni u arrestuan në Roterdam, Holandë. 6 persona të tjerë, mes tyre dhe Safet Bajri u arrestuan gjatë operacionit të djeshëm ndërsa tre të tjerë u arrestuan në kuadër të operacionit të ndërmarrë më 6 shtator 2018.
“Ndërhyrja operacionale është koordinuar mes grupeve të posaçme hetimore, në të dy shtetet duke shkëmbyer informacion intensiv. Gjithashtu u ngritën dhe operuan në 2 vendet, grupe të përbashkëta operacionale, të mbështetura nga forcat speciale të Policisë së Shtetit dhe atyre holandeze. Gjatë ditëve të operacionit për identifikimin dhe arrestimin e disa prej personave të mësipërm janë shkëmbyer me dhjetëra informacione, jo vetëm mes Policisë së këtyre 2 shteteve, por edhe autoriteteve ligj zbatuese që asistojnë Prokurorinë dhe Policinë, në Gjermani, Kroaci etj”, deklaroi drejtori i policisë Ardi Veliu.
Veprimet hetimore, nën drejtimin e Prokurorisë së Krimeve të Rënda, deri në goditjen e plotë të gjithë grupit kriminal “Bajri” kanë zgjatur mbi 6 muaj. Janë kryer dhjetëra orë përgjime, mijëra informacione të shkëmbyera me partnerët, janë analizuar mijëra faqe të dhëna, si edhe janë kryer veprime pro-aktve në terren, përmes kontrollit nga ajri (dron) dhe vëzhgimit intensiv. Oficerë të Policisë së Shtetit, në bashkëpunim me oficerë të kontaktit të vendeve të përfshira në operacion, kanë kryer veprime në terren për evidentimin, lokalizimin dhe ndalimin e shtetasve anëtarë të grupit, që vepronin jashtë Shqipërisë, e kryesisht në Holandë.