Nënkryetari i LSI-së, Petrit Vasili, ka reaguar pas mesazhit të Presidentit Ilir Meta, i cili ju drejtua me një mesazh qytetarëve, duke kujtuar se në themel të demokracisë qëndron vota, e drejta e çdo qytetari për t’u zgjedhur e për të zgjedhur, pluralizmi politik.
Ai e cilëson si “manifestin e një presidenti” duke vendosur edhe fjalët e tij në rrjetet sociale.
Presidenti Ilir Meta është shprehur i gatshëm për një betejë të re në krah të shqiptarëve, për përmbysjen e atij që e quan, regjimi i oligarkëve.
“Demokraci do të thotë që çdo qytetar të jetë i barabartë para ligjit. Ndaj ne sot kemi një mision të përbashkët historik: Të shpëtojmë demokracinë nga pengmarrja e një pakice të papërgjegjshme dhe jolegjitime!
Koha nuk pret!”, shkruan Meta në rrjet.
Sipas tij, kjo është beteja jonë, e njerëzve të lirë, të ndershëm dhe punëtorë, e rinisë sonë të mrekullueshme.
“Kjo është beteja e të gjithëve ne, që e duam me shpirt dhe zemër Shqipërinë! Dhe unë jam më i vendosur se kurrë!
Për një Shqipëri demokratike, si gjithë Europa!
Sepse liria, demokracia dhe dinjiteti njerëzor janë të panegociueshme!
Mbrojtja e demokracisë sot është një detyrë patriotike për t’i rikthyer besimin çdo qytetari dhe çdo të riu se e ardhmja më e mirë është vetëm këtu dhe kjo kërkon kontributin e secilit për ndryshim.
Zgjidhja nuk është largimi, por zgjimi dhe ndryshimi!”, shkruan Meta në mesazhin e dhënë në ditën ndërkombëtare të Demokracisë.