Kur nuk ka kaluar ende një muaj nga vrasja e teknikut të kondicionerëve nga dy djemtë e pronarit të shtëpisë ku po bëheshin punime, një tjetër ngjarje thuajse e ngjashme ka ndodhur në Tiranë.
Kësaj here punëtori që po kryente rikonstruksion në banesën e një ish-të dënuari për vjedhje, është goditur me thikë nga ky i fundit dhe ndodhet në gjendje të rëndë në Spitalin e Traumës.
Ngjarja ka ndodhur mbrëmjen e së premtes në rrugën “Myslym Keta”, në kryeqytet, dhe Policia ka arritur të arrestojë autorin e dyshuar të ngjarjes, 44-vjeçarin Stefan Agolli. Ndërsa i plagosuri, Dashamir Leçini, 51 vjeç, është transportuar me urgjencë në spital, ku ndodhet nën kujdesin e mjekëve. Burime nga Policia thanë se autori i dyshuar kishte rreth një javë që ishte kthyer nga Greqia dhe aktualisht po kryente rikonstruksionin e tualetit të shtëpisë.
Ai kishte punësuar për të kryer punime 51-vjeçarin Leçini, i cili do të kryente suvatimin e tualetit dhe do të shtronte pllakat. Të njëjtat burime thanë se mbrëmjen e së premtes mes pronarit dhe punëtorit ka pasur një debat të ashpër që më pas përshkallëzoi deri në konflikt fizik e në fund me përdorimin e thikës.
Ngjarja dyshohet të ketë ndodhur pasi i arrestuari Stefan Agolli ka pasur pakënaqësi për ritmin e punimeve, por edhe për cilësinë. Pas konfrontimit fizik, Agolli e ka goditur Leçinin me thikë në kurriz, duke e lënë të plagosur rëndë.
Ndërsa kanë qenë fqinjët ata që kanë lajmëruar Policinë. Në vendin e ngjarjes kanë shkuar menjëherë shërbimet e Komisariatit nr. 4 që kanë bërë të mundur arrestimin në flagrancë të autorit të dyshuar.
“Shërbimet e Policisë të Komisariatit Nr. 4 arrestuan në flagrancë shtetasin S. A., 44 vjeç, banues në Tiranë, i dënuar më parë për vjedhje. Në rrugën ‘Myslym Keta’ brenda në banesë, ky shtetas ka goditur me mjet prerës për motive të dobëta shtetasin D. L., 51 vjeç, i cili ka qenë duke kryer punime në banesën e shtetasit S. A. I dëmtuari D. L. aktualisht ndodhet në spitalin e Traumës nën kujdesin mjekësor”, tha zyrtarisht Policia.
Stefan Agolli, 44-vjeçari që u arrestua të premten për plagosjen e punëtorit në shtëpinë e tij, rezulton i dënuar më parë për vjedhje. Ai është arrestuar më 16 qershor të vitit 2014 nga shërbimet e Komisariatit nr. 4, pasi në rrugën “Bardhyl”, në autobusin e linjës së Unazës, dyshohej se i kishte vjedhur një shtetaseje portofolin, me një shumë prej 7200 lekësh.
Pas ngjarjes, ai u kap menjëherë në kryqëzimin e rrugës “Bardhyl”, në momentin që do të hidhte në lumin e Lanës sendet e vjedhura. Në cilësinë e provës materiale iu sekuestruan sendet e vjedhura. Ndërsa më pas, nga kontrolli i banesave të tij dhe hetimet e kryera, ai rezultoi të ishte autor i dyshuar edhe për 10 vjedhje të tjera./Panorama/
