Ish-ministri i Jashtëm Ditmir Bushati ka vijuar me kritikat për klasën politike në vend. Prej disa javësh Bushati po shfaqet gjithmonë e më shumë i ashpër në akuzat e tij dhe duket se nuk po kursen shuplakat për Kryeministrin Edi Rama.
Nga foltorja e Kuvendit, Bushati tha se kriza nuk vjen nga injoranca, por nga paaftësia për të ndërtuar një sistem vlerash.
Pas evidentimit të disa prej kryebashkiakëve të rinj të dalë nga votimet e 30 qershorit, si persona që kanë probleme me dekriminalizimin, Bushati ka folur për ndryshimin e sistemit, madje i ka drejtuar një apel Kryeministrit Rama.
“Kjo krizë nuk vjen nga injoranca, por nga paaftësia për të ndërtuar një sistem vlerash. Na duhet të jemi të drejtpërdrejtë. Kapitalizmi grabitqar që kemi ndërtuar të gjithë së bashku nuk premton për të bërë një hap përpara. Ne nuk mund të themi më se jemi vend i shqiponjave, kombi i Skënderbeut dhe Nënë Terezës, nuk mund të brohorasim nëpër stadiume.
Duhet të themi se cilat do të jenë qëllimet e vendit tonë. Izraeli një vend në mes të shkretëtirës sot është një ndër më të zhvilluarit në botë. Objektivat që duhet të përcaktojë një komb, duhet të kenë edhe Diasporën në thelb. Ne gjithë këtu para se ti drejtojmë gishtin njëri-tjetrit, duhet ti themi vetes ku isha ku para se BE të marrë vendimin për Shqipërinë. Kjo nuk është një çështje e majtë e djathtë.
Me shqetëson mbledhja e të ardhurave në një grusht njerëzish; më shqetëson që ne vazhdojmë të transportojnë kapital njerëzor; më shqetëson që nuk kemi partneritet besimi me Diasporën; nuk kemi njerëz nga Diaspora të punojnë me ne dhe të ndërtojnë një sistem gare më të drejtë.
Miq, mos ta harrojmë, Evropa ka jetuar 550 vjet pa Shqipërinë. Mund të jetojë dhe 500 të tjera. Po ne do ia falim vetes? Në rast se ne do tia falim vetes, cfarë do thonë fëmijët tanë?
Kur kam qenë student në Hollandë më tregonin rastin e Shqipërisë për vitet 1995-1996 për humbjen e shansit historik për të pasur një marrëveshje asociimi me BE. Unë nuk dua që vajza ime dhe djali im nesër të mësojnë të njëjtën histori që kam mësuar unë në 1995-1996 në 2015, 2020, 2025. 2035”, tha ai.
