Kryetari i Partisë Demokratike, Lulzim Basha deklaroi se miratimi i dy koncesioneve, ai i rrugës Millot-Balldren dhe Orikum–Dukan, do të shënojnë vjedhjen më të madhe në historinë e vendit.
Dy koncesionet u miratuan më herët në Kuvend, por Presidenti i ktheu për rishqyrtim. Këtë të enjte, pritet që socialistët të rrëzojnë dekretet e kreut të shtetit.
Për ata ligjvënës të cilët do të votojnë për rrëzimin e dekreteve të Metës, Basha paralajmëroi se do të jenë subjekt i ligjit antimafia.
“Pak metra pas meje, në konventën e cunguar nga zgjedhjet e republikës së Shqipërisë po finalizohet grabitja më e madhe në histori. Koncesioni i rrugës Milot-Balldren i Ndue dhe agim Kolës me vlerë 296 mln euro, apo 17 mln euro për km dhe koncesioni i rrugës Orikum-Dukat i Gjukurisë me 70 mln euro. Dekreti i presidentit po bëhet gati të hidhet poshtë nga cjapët dhe delet e kosrrupsionit në parlamentin e dalë si pasojë e krimit të organizuar dhe blerjes së votave. Vetëm një parlament i krimit dhe oligarkëve mund të votojë këtë vjedhje me ligj. Çdo anëtar i seancës që ngre dorën, nesër do jetë subjekt i ligjit antimafia. Sot do vëzhgojmë dhe do mbajmë shënim emrat. Nesër, do t’iu ndjekim këmba-këmbës. Çdo pasuri e juaj do jetë nën lupën e ligjit antimafia dhe të SPAK-ut”, tha Basha.
PD ka denoncuar edhe më parë se këto dy koncesione janë korruptive.
