“Operacion i gjerë” në Lezhë, në pranga një person në kërkim ndërkombëtar

Armë e sekuestruar gjatë aksionit

Tre persona, mes tyre një në kërkim ndërkombëtar, janë vënë në pranga nga policia e Lezhës. Arrestimet, siç bëjnë me dije burime zyrtare nga policia, erdhën në kuadër të “operacionit të gjerë kontrolli në të gjithë territorin e Lezhës, i koduar ‘Qarku’, për kapjen e personave në kërkim, si dhe atyre që qarkullojnë me armë zjarri”.

Një nga të arrestuarit ishte në kërkim ndërkombëtar, pasi ndaj tij rëndonte një dënim me 20 vite burg, në fushën e narkotikëve dhe për shfrytëzim prostitucioni, ndërsa një tjetër ishte në kërkim kombëtar për vjedhje. Gjithashtu u vu në pranga një shtetas, i cili qarkullonte me armë zjarri në brez, si dhe u procedua një tjetër në fushën e narkotikëve.

Aksioni

Policia njoftoi se, në kuadër të planit operacional të koduar ‘Qarku’, shërbimet policore të Drejtorisë dhe Komisariateve të Policisë Kurbin dhe Lezhë kanë ushtruar kontroll të gjerë në gjithë territorin e Lezhës me qëllim kapjen e personave në kërkim, si dhe atyre që qarkullojnë me armë zjarri e sende tjera kundërligjshme.

Si rezultat i tij, falë edhe mbështetjes dhe bashkëpunimit me qytetarët, u lokalizuan dhe u kapën shtetasit e shpallur në kërkim ndërkombëtar e kombëtar.

LEXO EDHE  "Kriza ka zaptuar shtetin. Edhe PS është në krizë"

– U arrestua përkohësisht me qëllim ekstradimi, shtetasi Erikson Tetaj, 23 vjeç, banues në Lezhë. Gjykata Monza Itali e ka dënuar me 20 vite burg për veprat penale “Shfrytëzim prostitucioni” dhe “Trafikim i lëndëve narkotike”, kryer në bashkëpunim. Interpol Tirana në bashkëpunim me Interpol Romën po vijojnë procedurat për ekstradimin e tij drejt Italisë.

– U kap dhe u ndalua shtetasi në kërkim kombëtar E.N., 22 vjeç, banues në Laç, për veprën penale “Vjedhja”. Ky shtetas dyshohet se është autori i vjedhjes së dyqanit të shtetases B.K., në Laç, ndodhur më 10 korrik 2019, ku ka vjedhur mallra dhe vlera monetare.

Gjithashtu, po në vijim të operacionit:

– U arrestua shtetasi B. P., 28 vjeç, banues në Mamurras, për veprën penale “Armëmbajtja pa leje”. Këtij shtetasi, gjatë kontrollit fizik iu gjet dhe sekuestrua në cilësinë e provës materiale një armë zjarri pistoletë TT me krehër me 7 fishekë, pa leje.

– U procedua penalisht shtetasi E.Sh., vjeç 32, banues në Lezhë, për veprën penale “Prodhimi dhe shitja e lëndëve narkotike”. Këtij shtetasi, gjatë kontrollit fizik iu gjetën dhe sekuestruan në cilësinë e provës materiale disa doza lëndë narkotike.