Zyrtare/ Nuk ka kandidatë, shtyhet zgjedhja e Inspektorit të Lartë të Drejtësisë

Nga Boldnews.al

Këshilli i Emërimeve në Drejtësi (KED) ka vendosur të rihapë garën për postin e Inspektorit të Lartë të Drejtësisë, pasi nga procedura e deritanishme nuk është plotësuar numri minimal i kandidatëve.

Kushtetuta e Republikës së Shqipërisë parashikon që Inspektori i Lartë i Drejtësisë zgjidhet me 3/5 e deputetëve, mes 5 kandidatëve të përzgjedhur dhe listuar nga Këshilli i Emërimeve në Drejtësi (KED).

Në Prill 2019, Këshilli i Emërimeve në Drejtësi shpalli vakancën për Inspektorin e Lartë të Drejtësisë, titullar i institucionit që ka detyrën për inspektimin periodik të gjyqtarëve dhe prokurorëve në Republikën e Shqipërisë.

Në vijim të procedurave verifikuese, KED lejoi kandidimin vetëm për 4 kandidatë, duke mos u arritur në këtë mënyrë kuorumi i nevojshëm kushtetues për t’ia kaluar emrat Parlamentit për votim.

Për këtë arsye, në mbledhjen e datës 9 Shtator 2019, Këshilli i Emërimeve në Drejtësi vendosi “Pezullimin e procedurës së verifikimit të kandidaturave për plotësimin e vendit vakant të Inspektorit të Lartë të Drejtësisë”, si edhe “shpalljen e procedurës së thirrjes për paraqitjen e kandidaturave për plotësimin e vendit vakant të Inspektorit të Lartë të Drejtësisë”.

Aplikantët e rinj duhet të paraqisin interesin për kandidim, së bashku me dokumentacionin shoqërues pranë Këshillit të Emërimeve në Drejtësi, deri në datën 20 Shtator 2019.

LEXO EDHE  Masakron me thikë të dashurën, habit shqiptari: E bëra për dashurinë

Në përfundim të procedurave të deritanishme, Këshilli i Emërimeve në Drejtësi ka lejuar kandidimin e 4 jurstëve, dy prej të cilëve me pikëpyetje mbi plotësimin e kritereve formale ligjore.

Kandidati Artur Malaj, gjyqtari i Apelit Administrativ, po përballet në Kolegjin e Posaçëm të Apelimit me Komisionerin Publik, i cili kërkon shkarkimin e tij nga detyra, pas konfirmimin nga Komisioni i Pavarur i Kualifikimit (shkalla e parë e Vetingut).

Kandidati Artur Metani, aktualisht Avokat i Përgjithshëm i Shtetit, është në kushtet e ndalimit ligjor, për shkak se, brenda 10 viteve të fundit, ka qenë pjesë e stafit politik të një prej institucioneve kushtetuese kryesore (Presidencës). “Boldnews.al” ka raportuar më parë me detaje se përse Artur Metani nuk mund të vijojë garën për Inspektor të Lartë të Drejtësisë. (Lexo KËTU).

Ndërkohë, dy emrat e tjerë, të lejuar për kandidimin për postin e Inspektorit të Lartë të Drejtësisë janë Eris Hysi dhe Marsida Xhaferllari.