Sajmir Tahiri, ish-ministër i Brendshëm, tha se akuzohet si pjesë e një grupi të strukturuar kriminalë, bashkë me disa policë, që siç ka dalë nga hetimi, nuk kanë qenë me etyra në Vlorë, në kohën kur unë akuzohem.
Bashkë me Tahirin akuzohen edhe ish-drejtuesit e policisë Jaeld Çela, Gjergj Kohila dhe Sokol Bode, si pjesë e një grupi kriminal.
Seanca gjyqësore ndaj Tahirit do të vazhdojë në 19 shtator, ndërsa sot prokuroria kërkoi dënimin me 12 vjet burg për të.
Tahiri mori në mbrojtje punonjësit e policisë, që akuzohen bashkë me të se kanë ndihmuar dhe favorizuar Habilajt në trafikun e drogës, duke u shprehur se këto punonjës policie janë ato që kanë bërë edhe denoncimet.
“Dhashë dorëheqjen për t’u përballur me drejtësinë si qytetar. Kemi dy vjet që dëgjojmë të njëjtat gjëra. Procedimi ndaj Habilajve ka nisur nga policë që kanë qenë në varësinë time. Ky është gjyq dhe para gjykatës ne i detyrohemi të gjithë të vërtetës. Dhe e vërteta ime është e provuar me fakte dhe prova edhe nga prokuroria italiane. Si të them unë që këta policë që akuzohen me mua, kanë denoncuar Habilajt që në 2016, dhe s ii bie që ne anëtarët e grupit kemi denoncuar njëri-tjetrin”, tha Tahiri.
Ish-ministri i Brendshëm tha se “nuk dua të mendoj fare se sa do të dënohem, pasi unë besoj te e vërteta ime, unë besoj kaq shumë te drejtësia, sa nuk më shkon mendja te dënimi”.
Lidhur me deklaratën e bërë në sallën e gjyqit se ka fjetur në hotele në jo më shumë se 140 euro nata, Tahiri tha se deklaratën e ka bërë për faktin se ishte akuzuar se kishte fjetur në hotele me 1 mijë euro nata.
“Kam pasur shpenzime normale të çdo qytetari. Nuk ia kam frikën askujt, nuk flas me kode porn ë mënyrë të drejtpërdrejtë, në gjykatë thashë se maksimumi që kam shpenzuar ishte 140 euro. Të vërtetën time do e përçoj aq fort te publiku në krahasim me gënjeshtrën që ka bredhur. Të vërtetën time do ia them çdo qytetari dhe nuk do të lodhem duke e bërë këtë”, tha Tahiri.
Ai shtoi se sikur të kthehej pas në kohë do të bënte të njëjta përpjekje sikundër ka bërë kur ka mbajtur postin e ministrit të Brendshëm.
“Ndaj kam folur hapur dhe kam sulmuar gjyqtarë dhe prokurorë, me emër dhe mbiemër pasi kur shoh se për të gjetur drejtësinë unë sorollatem dyerve të gjykatës dhe prokurorisë, atëherë ç’mund të ndodhë me qytetarët e thjeshtë.
Janë hetuar familjarë të mi, prindërit e mi, madje edhe rreth 30 pjesëtarë të shoqërisë sime”, tha Tahiri.
