Vijon misteri mbi zhdukjen e kapitenit të jahtit luksoz të biznesmenit turk Nedim Akyuz. Ky i fundit ka ardhur në Shqipëri, ku i shoqëruar nga diplomatë të ambasadës turke, kanë kontaktuar drejtues të Policisë së Lezhës, me synim tërheqjen e mjetit lundrues që ndodhet i bllokuar në Shëngjin.
Mësohet se ka pohuar para drejtuesve të policisë se dokumentet që janë gjetur në jaht i përkasin kapitenit të mjetit lundrues, Sevgin Javuz, për të cilin u deklarua fillimisht se ishte edhe pronari i jahtit.
Jahti luksoz u gjet nga një peshkarexhë në ujrat shqiptare, ndërsa nga kontrollet e ushtruara në bordin e jahtit u gjetën dokumente në emrin e Javuz.
Në fakt jahti luksoz është në pronësi të Nedim Akyuz, biznesmen në fushën e tekstileve.
Nga dëshmitë e dhëna para policisë, Akyuz ka pohuar se jahti ka udhëtuar drejt Korfuzit, atje ku kishte vendosur të bënte pushimet, vëllai i tij me familjes.
Më pas jahti me kapitenin Javuz ka shkuar në Budva ku është furnizuar me karburant.
Ky është momenti kur nis edhe misteri, pasi pas daljes nga porti i Budvës kanë humbur kontaktet me kapitenin Javuz.
Kjo është pohuar edhe nga biznesmeni Akyuz, i cili ka thënë se biseda e fundit me të ka qenë më 6 shtator.
“Nga Korfuzi, pasi ka lënë në port familjen e vëllait, kapiteni i jahtit ka udhëtuar i vetëm në drejtim të Malit të Zi, ku në Budva është furnizuar me karburant dhe më pas, ka marrë rrugën sërish të kthimit drejt Korfuzit.
Hera e fundit që kam biseduar me kapitenin e jahtit ka qenë data 6 shtator, ku ai më ka pohuar se ishte duke lundruar në ujërat shqiptare, pranë zonës së Durrësit, por në det kishte jashtëzakonisht shumë erë dhe lundrimi po bëhej i vështirë”, mësohet se ka deklaruar Akyuz para policisë.
Fillimisht u dyshua se Sevgin Javuz mund të ishte rrëmbyer, ndërsa pista që dyshohet aktualisht është se ai mund të ketë rënë në det. Dyshimet shtohen pasi policia ka gjetur në bordin e jahtit pajisjet e peshkimit. Mësohet se autoritetet shqiptare janë në pritje të informacioneve zyrtare nga Turqia dhe Mali i Zi, vend nga i cili jahti me kapitenin në bord, ka bërë udhëtimin e fundit.
