Këngëtarja e mirënjohur shqiptare me origjinë çame, Enkeleda Arifi është pjesë e listave për deputet të VetëVendosjes në zgjedhjet e ardhshme të Kosovës.
Ka qenë kryetari i VV, Albin Kurti i cili e ka prezantuar ditën e sotme ku shprehet se ajo është këngëtare profesioniste prej 25 vitesh dhe ka një krijimtari të gjerë ku përfshihen dhjetra albume e këngë të zhanreve të ndryshme.
Ai nuk lë pa përmendur edhe vepritarinë e saj jashtë muzikës që kanë të bëjnë me mësimdhënien, shoqërinë civile si dhë administratën shtetërore.
Postimi i Kurtit:
Këngëtarja e mirënjohur shqiptare, Enkelejda Arifi, na është bashkuar në Lëvizje dhe është në listën e kandidatëve të VETËVENDOSJE!-s për deputete në Kuvendin e Kosovës. Ajo vjen nga Durrësi ku është shkolluar për muzikë (flautë dhe kanto) dhe jeton në Gjilan ku punon si zyrtare për kulturë në komunë që nga viti 2010.
Ajo është këngëtare profesioniste prej 25 vitesh dhe ka një krijimtari të gjerë ku përfshihen dhjetra albume e këngë të zhanreve të ndryshme.
Enkelejda në vitet 2001 e 2002 ishte mësimdhënëse në shkollën fillore “Abdullah Tahiri” të Malishevës në Gjilan, pastaj deri në 2006 ka punuar në programin për shoqërinë civile të NDI, për të vazhduar në vitin 2007 si koordinatore e NDI për Gjilan. Në vitet 2008 dhe 2009 ka qenë pjesë e KQZ-së në Gjilan si dhe trajnere për procesin zgjedhor. Ka përvojë disa vjeçare dhe është eksperte në avokim, lobim, monitorim të pushtetit lokal dhe procesit zgjedhor.
Me këngën në zemër dhe me këngëtaren Enkelejda ecim drejt fitores më 6 tetor 2019
