Komisioni për Sigurinë Kombëtare ka rrëzuar me votim unanim dekretin e Presidentit Ilir Meta që ktheu për rishqyrtim ligjin për rezervat materiale të shtetit.
Deputetja Antoneta Dhima tha se lëvrimi i mallrave të grupit A bëhet nëpërmjet një akti kolegjial dhe se arsyetimi i presidentit për kthimin e dekretit nuk qëndron. “Përdorimi i rezervave materiale te shtetit bëhet në raste te veçanta”, shtoi ajo, “lëvrimi i mallrave rezerve me urdhër të kryeministrit nuk përben shkelje dhe burokraci”.
Ligji u miratuar me votat e mazhorancës në parlament dhe u kthye për rishqyrtim nga Meta në muajin korrik.
Ndryshimi ligjor i miratuar synon të thjeshtojë procesin e lëvrimit të mallrave rezervë të shtetit që bëjnë pjesë në grupin A, duke e zëvendësuar miratimin e lëvrimit të tyre nga me vendim të Këshillit të Ministrave siç parashikon aktualisht ligji në fuqi, me një akt individual, “Urdhër të Kryeministrit”. Në grupin e mallrave rezervë të shtetit përfshihet ari dhe lëvizjet me ligjin aktual në fuqi bëhen me VKM. Por, sipas ndryshimeve në nenin nr.10 të ligjit, kryeministri ia heq këtë të drejtë Qeverisë dhe ia ngarkon vetes.
Në arsyetimet e kreut të shtetit thuhet se ligji nuk garanton plotësisht mbrojtjen e interesit publik. Gjithashtu, ndërmarrja e kësaj iniciative ligjore, thuhet në arsyetimet e Metës, është e pajustifikuar ligjërisht.
