Presidenti Ilir Meta ishte i pranishëm sot për rreth 3 orë në Komisionin Hetimor Parlamentar, të ngritur me firmat e 55 deputetëve socialist, që kërkojnë shkarkimin e tij.
Meta sqaroi arsyet sepse kishte anulluar mbajtjen e zgjedhjeve vendore më 30 qershor, duke dhënë si argument ndër të tjera informacione sekrete që kishte, sipas të cilave në 8 qershor, pra ditën që ai ka bërë të njohur vendimin për anullimin e procesit, do të digjej Kuvendi.
Pasi dha dëshminë para Komisionit, Meta iu përgjigj pyetjeve të deputetëve, një situatë që kaloi me batuta, thumbime dhe hera herës edhe me falenderime mes palëve.
Një nga deputetët që iu drejtua me pyetje Presidentit ishte edhe Halit Valteri i opozitës së re, ndërsa Presidenti në përgjigjen e tij, i vuri në dukje ligjvënësit të ri se parlamentarizmi është edhe eksperiencë.
Duket se kjo përgjigje e Kreut të Shtetit nuk është gëlltitur nga deputeti i opozitës së re, që ka zgjedhur rrjetet sociale për të dhënë një përgjigje. Dhe në reagimin e tij, valteri nuk thumbon vetëm Metën, por edhe Ulsi Manjën, kryetarin e Komisionit Hetimor.
“Me krenari dua t’i them këtij soji, se nuk kam ndërmend aspak të fitojë eksperiencë duke hypur nëpër jahtet e pronarëve të mediave të ngritura me para të dyshimta dhe as tu bëj kronika vilave me shumë hale të politikanëve të korruptuar! Sepse zonja sejmene, unë besoj ende tek parlamentarizmi pa “eksperiencë”, se ai me eksperiencë, që ju i thurni elozhe, po e provojmë çdo ditë dhe e kemi parë prej 30 vitesh se ku po na çon”, shkruan valteri në rrjet, një përgjigje që duket e ka me Presidentin.
Ndërsa për Manjën, deputeti i ri shkruan “kryekomisioneri, kryepërfaqësuesi i 55 deputetëve të partisë që mblodhi firmat për shkarkimin e presidentit, kush nuk e ka kuptuar bëhet fjalë për të egrin, të tmershmin, të llaftarishmin z. Ulsi, na propozoi në mënyrë të turpshme, që t’i mblidhnim pyetjet tona të gjitha bashkë e t’ia jepnim presidentit, e ai më pas të na kthente përgjigje.
Ishte që ishte Ulsiu, kot nuk na kërkoi t’ia dërgonim me email presidentit pyetjet dhe të na kthente përgjigje pastaj me “Ç”, kur të kishte terezi. Aq shumë ranë në sy nga falënderimet, sa mediat nisën të dyshojnë, se mos kishte ngelur ende ndonjë shkëndijë e vjetër nga miqësia e tyre. Ore ndoshta nuk kishte faj Ulsiu, ndoshta u tremb i shkreti kur i hyri në derë “bariu””.
