Kryeministri Edi Rama do të zhvillojë gjatë kësaj jave një vizitë zyrtare në Berlin, ku do të pritet në një takim të veçantë edhe nga kancelarja Angela Merkel.
Më 13 Shtator, kancelarja do të mirëpresë kryeministrin e Shqipërisë, Edi Rama, në Kancelarinë Federale në orën 09:30. Në fokus të diskutimit mes tyre do të jenë çështjet europiane, si dhe marrëdhëniet bilaterale dhe çështjet rajonale, thuhet në një njoftim të Ambasadës gjermane.
Duket se çështja më delikate që do të diskutohet është ajo për ndryshimin e kufijve mes Kosovës dhe Serbisë, për të cilën Gjermania ka një qëndrim të prerë, kundër asaj që quhet si shkëmbimi i territoreve.
Në anën tjetër, Kryeministri Edi Rama ka mbështetur idenë, madje e cilëson atë si një diçka të natyrshme.
Rama e ka thënë hapur se Shqipëria mbështet arritjen e një marrëveshje historike sa i takon kufijve, duke shtuar se është krah SHBA dhe BE për këtë çështje.
Gjermania ka një qëndrim të prerë, ndërsa i kërkohet Kosovës të ruajë kufijtë e saj.
“Ne, natyrisht, mbështesim të gjitha bisedimet që çojnë tek synimet përfundimtare, por në të njëjtën kohë duhet të themi se integriteti territorial siç është sot është një vlerë e rëndësishme”, ka deklaruar kancelarja gjermane, duke shtuar se një marrëveshje e tillë për territoret mund të krijonte një precedent dhe të çonte në negociata të ngjashme në vende të tjera në Ballkan.
Nuk dihet nëse Rama do i qëndrojë pozicionit të shprehur publikisht duke e trajtuar çështjen e kufijve mes Kosovës dhe Serbisë si diçka normale, apo do të tentojë të tërhiqet nga ky pozicion përballë kancelares gjermane.
Gjithashtu gjatë vizitës në Berlin, Kryeministri Rama përveç takimit me kancelaren gjermane do të zhvillojë takime edhe me deputetët e grupit më të madh në parlamentin e Gjermanisë CDU/CSU ku pritet të takohet me nënkryetarin si dhe grupet e punës për çështje të Bashkimit Evropian.
Qeveria gjermane dhe aleatet e saj pritet të marrin vendimin për negociatat ne datën 24 shtator, ndërsa 3 ditë më vonë Bundestagu do të shprehet me votë.
Deutsche Welle duke cituar burimet e Unionit CDU/CSU e shpreh se shumica e ligjvënësve gjermane janë te prirur për ti dhënë një PO me kushte Shqipërisë.